ရန်ကုန်မြို့မှာ ဒီနေ့ နေ့လယ်ပိုင်း အချိန်အခါမဟုတ် နေရာကွက်ကျားမိုးရွာ
ဖေဖော်ဝါရီ ၂၄
ရန်ကုန်မြို့ရဲ့ မြို့နယ်အချို့မှာ ဒီနေ့ နေ့လယ် ၁၂ နာရီကျော်ကစပြီး အချိန်အခါမဟုတ် နေရာကွက်ကျား မိုးရွာသွန်းခဲ့ပြီး ရန်ကုန်မြို့ရဲ့ လူစည်ကားရာ မင်္လာတောင်ညွှန့်မြို့နယ်ရှိ ယုဇနပလာဇာဝန်းကျင်မှာလည်း မိုးရွာသွန်းခဲ့ပါတယ်။
မိုးလေဝသနှင့်ဇလဗေဒညွှန်ကြားမှုဦးစီးဌာနရဲ့ ဒီနေ့မနက် ၇ နာရီမှာ ထုတ်ပြန်ချက်အရ တနင်္သာရီတိုင်းမှာ နေရာအနှံ့အပြား၊ ကရင်ပြည်နယ်၊ မွန်ပြည်နယ်နဲ့ ရှမ်းပြည်နယ်(အရှေ့ပိုင်း)တွေမှာ နေရာစိပ်စိပ်၊ ဧရာဝတီတိုင်းနဲ့ ကချင်ပြည်နယ်တွေမှာ နေရာကျဲကျဲနဲ့ နေပြည်တော်၊ ရန်ကုန်တိုင်း၊ ပဲခူးတိုင်း၊ စစ်ကိုင်းတိုင်းအထက်ပိုင်း၊ ကယားပြည်နယ်၊ ချင်းပြည်နယ်၊ ရခိုင်ပြည်နယ်နဲ့ ရှမ်းပြည်နယ် (မြောက်ပိုင်းနဲ့ တောင်ပိုင်း)တွေမှာ နေရာကွက်ကျား မိုးထစ်ချုန်းရွာမယ်လို့ ခန့်မှန်းထားပါတယ်။
နောက်(၂)ရက်အတွက် ခန့်မှန်းချက်မှာလည်း နေပြည်တော်၊ ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်နဲ့ ရှမ်းပြည်နယ်တွေမှာ နေရာကျဲကျဲကနေ နေရာစိပ်စိပ် မိုးထစ်ချုန်းရွာနိုင်တယ်လို့ ဖော်ပြထားပါတယ်။
နေပြည်တော်နဲ့ အနီးတစ်ဝိုက်အတွက် မနက်ဖြန် မနက်အထိ ခန့်မှန်းချက်မှာ နေသာချိန်ရှိပြီး၊ နေရာကွက်ကျား မိုးအနည်းငယ် ထစ်ချုန်းရွာနိုင်သလို ရန်ကုန်မြို့နဲ့ အနီးတစ်ဝိုက်အတွက် မနက်ဖြန် မနက်အထိခန့်မှန်းချက်မှာ တိမ်အသင့်အတင့် ဖြစ်ထွန်းပြီး၊ နေရာကွက်ကျား မိုးထစ်ချုန်း ရွာနိုင်တယ်လို့ ခန့်မှန်းထားပါတယ်။
Credit - Myanmar Transparency News Agency
#သတင်းဟင်းလေးအိုးကြီး
+6
