#နိုင်ငံတကာသတင်း
◼ စစ်ပွဲအချိန်ဆွဲရေး မော်စကို၏ ကြိုးပမ်းမှု တားဆီးရန်ဇီလန်စကီးတိုက်တွန်း
အပြည့်အဝ အပစ်အခတ်ရပ်စဲရေး အမေရိကန်၏ အဆိုပြုချက်ကို ရုရှားခေါင်း ဆောင်ဗလာဒီမာပူတင် က ထိရောက်စွာ ပယ်ချလိုက်ကြောင်းယူကရိန်းသမ္မတ ဇီလန်စကီးကပြောကြားပြီး ယူကရိန်းအပေါ် အချိန်ဆွဲ၍ စစ်ဆင်နွှဲမည့် မော်စကို၏ ကြိုးပမ်းမှုများကို တားဆီးကြရန် တိုက်တွန်းသည်။
ယူကရိန်း၏စွမ်းအင်လုပ်ငန်းအခြေခံအဆောက်အအုံများကိုတိုက်ခိုက်ခြင်းအားယာယီရပ်တန့်သွားမည်ဖြစ်ကြောင်း ပူတင်က ထရန့်နှင့် ဖုန်းခေါ်ဆိုဆွေး နွေးမှုတွင် သဘောတူခဲ့သော်လည်း ရက် ၃၀ အပြည့်အဝ အပစ်ရပ်ရေးကို ထောက်ခံရန်ငြင်းဆန်ခဲ့ရာ အမြဲတမ်း ငြိမ်းချမ်းရေးဆီသို့ ပထမအဆင့်အဖြစ် အမေရိကန်သမ္မတ ဒေါ်နယ်ထရန့်၏ ကြိုးစားခဲ့သည့်အဆင့်ထက်များစွာ လျော့နည်းနေခဲ့သည်။
ပူတင်နှင့် ထရန့် တို့သဘောတူခဲ့သည့် အကန့်အသတ်ဖြင့် အပစ်ရပ်စဲမှုကို ၎င်းတို့ဘက်က ထောက်ခံကြောင်း ယူကရိန်းသမ္မတ က ပြောကြားသည်။
သို့သော် ဖုန်းခေါ်ဆိုမှုထွက်ပေါပြီး နာရီ အနည်းငယ်ကြာချိန်၌ ယူကရိန်း၏အရပ်သား အခြေခံ အဆောက်အအုံများအပေါ် မော်စကိုက ဒရုန်းပေါင်း ၄၀ ကျော်ဖြင့် တိုက်ခိုက်ခဲ့ပြီးနောက် မစ္စတာပူတင်အား တားဆီးကြရန် ဇီလန်စကီးက ကမ္ဘာကြီးအား တိုက်တွန်းသည်။
“ ဒီကနေ့မှာ ပူတင် က အနှစ်သာရအားဖြင့် လုံးဝအပစ်ရပ်ဖို့ကို ပယ်ချခဲ့ပါတယ်။ ဒါကို တုံ့ပြန်မှုအဖြစ် စစ်ပွဲကို အချိန်ဆွဲသွားမယ့် ပူတင်ရဲ့ ကြိုးပမ်းမှုမှန်သမျှကို ကမ္ဘာကြီးက ပယ်ချသင့်ပါတယ်။” ဟု ဇီလန်စကီးက တယ်လီဂရမ်တွင် ပြောကြားသည်။
ထရန့် နှင့် ပူတင်ကြား တယ်လီဖုန်းဖြင့် ဆက်သွယ်မှုသည် ပိုမိုကျယ်ပြန့်သော ငြိမ်းချမ်းရေးအစီအစဉ်ဆီချက်ချင်းတက်လှမ်းနိုင်ရေးအတွက် ရည်ရွယ်ခဲ့ကြောင်း နှင့် နောက်ဆွေးနွေးပွဲအသစ်ကို ဆော်ဒီအာရေးဗီးယားနိုင်ငံတွင် ချက်ချင်းစတင်သွားမည်ဖြစ်ကြောင်း အမေရိကန်သမ္မတ အိမ်ဖြူတော်က ပြောကြားသည်။
အင်္ဂါနေ့ နှောင်းပိုင်း တွင် ပြုလုပ်ခဲ့သော ရုရှားဒရုန်း တိုက်ခိုက်မှုများအတွင်း ဆူမီမြို့ ဆေးရုံတစ်ရုံကို ထိမှန်ခဲ့ကြောင်း နှင့် မြို့တော် ကိဗ်အနီးမှ ဒေသများအပါအဝင် ယူကရိန်း၏ အခြားဒေသအများအပြားကိုလည်း မော်စကိုက ပစ်မှတ်ထားခဲ့ကြောင်း ဇီလန်စကီး နှင့် ၎င်း၏ အရာရှိများက ပြောကြားကြသည်။
“ ရုရှားက အခုလောလောဆယ်ကိုပဲ အရပ်သားအခြေခံအဆောက်အအုံနဲ့ ပြည်သူလူထုကို တိုက်ခိုက်နေပါတယ်။” ဟု ယူကရိန်းသမ္မတရုံးအကြီးအကဲ အန်ဒရေးယာမက် က တယ်လီဂရမ်တွင် ရေးသားခဲ့သည်။
ထရန့် နှင့် ပူတင် စကားပြောပြီး နာရီ အနည်းငယ်အတွင်း ဖြစ်ပေါ်လာသော တိုက်ခိုက်မှုများနှင့်ပတ်သက်၍ ရုရှားတို့ဘက်က မည်သည့်မှတ်ချက်မှ ထွက်ပေါ်မလာသေးကြောင်း ရိုက်တာသတင်းက ဖော်ပြသည်။
သတင်း-ရဲမင်း
ကိုးကား-Reuters
