ထိုင်း၌ ရွှေ့ပြောင်းလုပ်သားများကို ယခင်ထက် စစ်ဆေးမှုတင်းကြပ်နေရာ ကိုယ်ပိုင်စီးပွားရေးလုပ်ကိုင်နေသည့် မြန်မာများ အခက်တွေ့နေ
ဖေဖော်ဝါရီ ၂၆
ထိုင်းနိုင်ငံ၌ ရွှေ့ပြောင်းလုပ်သားများကို ယခင်ထက် စစ်ဆေးမှုတင်းကြပ်နေခြင်းကြောင့် ကိုယ်ပိုင်စီးပွားရေးလုပ်ကိုင်နေသည့် မြန်မာများအခက်တွေ့နေကြောင်း ထိုင်းနိုင်ငံရောက် မြန်မာလုပ်သားအရေးဆောင်ရွက်နေသူတစ်ဦးက ပြောသည်။
ယခုနောက်ပိုင်းတွင် မြန်မာလုပ်သားများအနေဖြင့် ထိုင်းနိုင်ငံသို့ တရားဝင်သွားရောက်ခြင်းထက် တရားမဝင်သွားရောက်မှုများ ပိုမိုများပြားနေသည့်အပြင် ထိုင်းနိုင်ငံရောက် မြန်မာလုပ် သားများအပါအဝင် အခြားရွှေ့ပြောင်းနိုင်ငံခြားသားများအနေဖြင့် ထိုင်းနိုင်ငံ၏ဥပဒေအရ တားမြစ်ထားသည့် အလုပ်များကိုလုပ်ကိုင်လျက်ရှိသည်။ ထိုသို့ဆောင်ရွက်လာခြင်းကြောင့် ထိုင်းနိုင်ငံသားများအနေဖြင့် ၎င်းတို့အတွက် အလုပ်အကိုင်အခွင့်အလမ်းဆုံးရှုံးသည်ဟု ပြောဆိုမှုများလည်းရှိနေရာ သက်ဆိုင်ရာမှ ယခင်ထက်ပိုမိုတင်းကြပ် စစ်ဆေးလာကြောင်း သိရသည်။
"ထိုင်းကလွဲရန် ကျန်တဲ့ရွှေ့ပြောင်းအလုပ်သမားအားလုံးပေါ့ အဲဒီထဲမှာ ကျွန်တော်တို့မြန်မာတွေလည်းပါတယ်။ သူတို့တားမြစ်ထားတဲ့ အလုပ်တွေကိုဝင်ရောက်လုပ်ကိုင်တဲ့အတွက် အလုပ်အကိုင်အခွင့်အလမ်းတွေဆုံးရှုံးပါတယ်ဆိုပြီး လူမှုကွန်ယက် စာမျက်နှာတွေမှာ မကြာခဏသတင်းတွေတင်တာတွေ၊ ဗီဒီယိုတွေတင်တာတွေရှိတော့ အခုနောက်ပိုင်းမှာ အစိုးရပိုင်းတွေကနေပြီးတော့ နယ်မြေတွေမှာရှိနေတဲ့ တရားမဝင်အလုပ် တွေကို ဝင်ရောက်လုပ်ကိုင်နေတဲ့ အလုပ်သမားတွေအားလုံးကို အရေးယူဖို့ရှင်းလင်းဖို့ဆိုပြီး စီမံချက်တွေနဲ့ ဆောင်ရွက်နေတာ။ နောက်ပြီးတော့ ကျားဖြန့်လိုမျိုးကိစ္စတွေအပါအဝင် နိုင်ငံခြားသားတွေနဲ့ ပတ်သက်ပြီး နယ်မြေတွေမှာရှိနေတဲ့ နိုင်ငံခြားသားအကုန်လုံးကို စောင့်ကြည့်ဖို့တွေ၊ သူတို့ရဲ့လှုပ်ရှားမှုတွေကို စာရင်းပြုစုသတင်းပို့ဖို့တွေ သတင်းတွေထုတ်ပြန် လာတယ်ဆိုတော့ အခုကပိုပြီးတော့ ဥပဒေနဲ့မညီတဲ့ဟာတွေဆို တင်းတင်းကြပ်ကြပ်ပိုပြီးတော့လုပ်လာတာပေါ့"ဟု အထက်ပါထိုင်းနိုင်ငံရောက် မြန်မာလုပ်သားအရေးဆောင်ရွက်သူက ဆိုသည်။
ထိုင်းနိုင်ငံ၌ ယခုနောက်ပိုင်းတွင် စစ်ဆေးမှုများ ပိုမိုတင်းကြပ်နေခြင်းဖြစ်ပြီး စက်ရုံ၊ အလုပ်ရုံများတွင် တရားဝင်လုပ်ကိုင်နေသည့် ရွှေ့ပြောင်းအလုပ်သမားများအတွက် ပြဿနာမရှိနိုင်သော်လည်း ကိုယ်ပိုင်စီးပွားရေးလုပ်ကိုင်နေသူများအနေဖြင့် သတိပြုနေထိုင်သင့်ကြောင်း ၎င်းကဆက်လက်ပြောသည်။
"ပုံမှန်စက်ရုံအလုပ်ရုံသမားတွေအတွက်တော့ ထွေထွေထူးထူးမဖြစ်ပါဘူး။ ပုံမှန်ပါပဲ။ ဈေးရောင်းနေတဲ့သူတွေ၊ ပွဲစားလုပ်နေတဲ့သူတွေကို အခုနောက်ပိုင်းမှာဖမ်းနေတယ်။ မြန်မာအပါအဝင် ကိုယ်ပိုင်စီးပွားရေးလုပ်နေတဲ့ နိုင်ငံခြားသားအလုပ်သမားတွေကို လိုက်ဖမ်းနေတယ်ဆိုတော့ သူတို့ပဲထိခိုက်မှာပါ။ အခုနောက်ပိုင်းမှာ ပိုပြီးတော့ တင်းကြပ်လာတယ်။ ဘာလို့လဲဆိုတော့ နားလည်မှုနဲ့လုပ်နေတဲ့လုပ်ငန်းတွေမှာ တိမ်းစောင်းမခံတော့ပဲနဲ့ စစ်ဆေးလာတာပေါ့။ တချို့ဆို ထိုင်းတစ်ယောက်ယောက်ကိုငှားပြီးတော့ အလုပ်ရှင်နာမည်ခံခိုင်းပြီး ကိုယ်ပိုင်စီးပွားရေးလုပ်တဲ့သူတွေကအစ မရတော့ဘူး လုံးဝတင်းကြပ်တာပေါ့။ နာမည်ခံခိုင်းရင်တော့ ဘယ်သူကနာမည်ခံပြီးတော့ ဘယ်သူကယူတာလည်းကအစ စစ်ဆေးလာပြီ"ဟု အထက်ပါလုပ်သားအရေးဆောင်ရွက်သူက ဆိုသည်။
ထိုင်း၌ ပြီးခဲ့သည့် ၂၀၂၄ ခုနှစ် အောက်တိုဘာလကလည်း ထိုင်းနိုင်ငံရှိ အဖွဲ့အစည်းအချို့မှ ထိုင်းအစိုး၊ နိုင်ငံခြားရေးဝန်ကြီးဌာနသို့ ရွှေ့ပြောင်းအလုပ်သမားကိစ္စရပ်များနှင့် ပတ်သက်သည့် အချက်(၈)ချက်ကို တောင်းဆိုစာပေးပို့မှုများလည်းရှိခဲ့ပြီး ဆန္ဒပြမှုများလည်း ဖြစ်ပွားခဲ့သည်။
#centralnewsnaypyitaw
