မြန်မာနိုင်ငံတွင် တိရစ္ဆာန်အစာနှင့် ကြက်သားပေါက် ထုတ်လုပ်ရောင်းချသည့် ကိုရီးယားကုမ္ပဏီ CJ Feed Myanmar ယာယီရပ်နားလိုက်ကြောင်း အဆိုပါကုမ္ပဏီက သတင်းထုတ်ပြန်သည်။
လတ်တလောဖြစ်ပွားနေသည့် စီးပွားရေးလုပ်ငန်းများ လည်ပတ်မှုအကြပ်အတည်းသည် ကုမ္ပဏီအပေါ်လည်း သက်ရောက်မှုရှိလာခဲ့သည်ဟု အဆိုပါကုမ္ပဏီ၏ ထုတ်ပြန်ချက်တွင် ဖော်ပြထားသည်။
ကုမ္ပဏီအနေဖြင့် အရောင်းအဝယ်လုပ်ငန်းများ ခက်ခဲလာခြင်း၊ ကုန်ကြမ်းကုန်ကျစရိတ်များတိုးမြင့်လာခြင်း၊ ကုန်ကြမ်းရရှိမှုခက်ခဲခြင်းတို့ကို ရင်ဆိုင်ရသည့်အပြင် လုပ်ငန်းလည်ပတ်ရန်အတွက် ထုတ်လုပ်မှုလုပ်သားအင်အား မလုံလောက်မှုများ ဖြစ်ပေါ်နေခြင်း အစရှိသည့် မလွန်ဆန်နိုင်သောဖြစ်ရပ်များ ဖြစ်ပေါ်နေခြင်းတို့ကြောင့် မေ ၂၈ ရက်မှစတင်ပြီး တိရစ္ဆာန်အစာနှင့် ကြက်သားပေါက်များ ထုတ်လုပ်ရောင်းချနေမှုကို ခေတ္တရပ်နားထားမည်ဖြစ်ကြောင်း အဆိုပါကုမ္ပဏီက ထုတ်ပြန်ထားသည်။
ယင်းသို့ရပ်နားမည်ဖြစ်သဖြင့် အရောင်းကိုယ်စားလှယ်များ၊ ဖောက်သည်များအနေဖြင့် ကုန်ဖိုးအကြွေးကျန်များကို ဇွန် ၂၈ ရက် နောက်ဆုံးထားပြီး ကုမ္ပဏီသို့ မပျက်မကွက် ပြန်လည်ပေးသွင်းကြရန်နှင့် လက်တွဲလုပ်ဆောင်ခဲ့သည့် အရောင်းကိုယ်စားလှယ်များ၊ ဖောက်သည်များကို အထူးကျေးဇူးတင်ရှိသည်ဟု CJ Feed Myanmar ၏ ထုတ်ပြန်ချက်တွင် ဖော်ပြထားသည်။
ကိုရီးယားကုမ္ပဏီတစ်ခုဖြစ်သည့် CJ Feed Myanmar မှာ မှော်ဘီမြို့နယ် မြောင်းတကာစက်မှုဇုန်တွင် စက်ရုံတည်ဆောက်ထားပြီး ကြက်၊ ဝက်၊ ဘဲ၊ ငါးအစားအစာများကို ထုတ်လုပ်ရောင်းချခြင်း၊ ကြက်သားဖောက် လုပ်ငန်းမှ ကြက်သားပေါက်များကို မန္တလေး၊ ပဲခူး၊ ရန်ကုန်၊ ဧရာဝတီတိုင်းအပါအဝင် ဒေသအနှံ့အပြားသို့ ဖြန့်ဖြူးရောင်းချလျက်ရှိသည်။
၂၀၁၇ ခုနှစ်တွင် ဒေါ်လာ ၂၁ သန်းကျော်ရင်းနှီးမြှုပ်နှံကာ ပြည်တွင်းစျေးကွက်အတွင်း ဝင်ရောက်လာသည့် အဆိုပါကုမ္ပဏီမှာ ခုနစ်နှစ်ကျော်အကြာတွင် ယာယီလုပ်ငန်းရပ်နားခဲ့ခြင်းဖြစ်သည်။
