အမေရိကန် ပညာရေးဝန်ကြီးဌာနကို ထရန့် ပိတ်သိမ်းဖို့ ပြင်ဆင်
ဝါရှင်တန်၊ မတ် ၂၁
မဲဆွယ်စဉ်က ပေးခဲ့တဲ့ ကတိအတိုင်း ပညာရေးဝန်ကြီးဌာနကို ပိတ်သိမ်းမယ့် အထူးအမိန့်ကို အမေရိကန်သမ္မတ ဒေါ်နယ် ထရန့်က မတ်၂၀ ရက်မှာ လက်မှတ်ရေးထိုးသွားမှာ ဖြစ်ကြောင်း အိမ်ဖြူတော်က ပြောလိုက်ပါတယ်။
အဲဒီဌာနကို ထရန့်အစိုးရက မဖျက်သိမ်းရေးနဲ့ ဝန်ထမ်း ထက်ဝက် နီးပါးကို မထုတ်ပယ်စေရေး ဒီမိုကရက်ပြည်နယ်အစိုးရ ရှေ့နေချုပ်တွေက ပြီးခဲ့တဲ့သီတင်းပတ်မှာ တရားစွဲဆိုခဲ့ပြီး စိန်ခေါ်ထားပါတယ်။
အမေရိကန်နိုင်ငံသားတွေ အားကိုးအားထား ပြုနေကြရတဲ့ အကျိုးခံစားခွင့်တွေ၊ စီမံကိန်းတွေနဲ့ ဝန်ဆောင်မှုတွေ အနှောင့်အယှက် မဖြစ်စေရေး၊ ထိရောက်စေရေး သေချာအောင် ဆောင်ရွက်ရမှာ ဖြစ်ပြီး ပညာရေးဝန်ကြီးဌာနကို ပိတ်သိမ်းဖို့ အခုလိုညွှန်ကြားချက်ကို ပညာရေးဝန်ကြီး လင်ဒါ မက်မာဟွန်ထံ ညွှန်ကြားထားတာ ဖြစ်ပါတယ်။
ဒီအထူးညွှန်ကြားချက်ကို မတ်လ လဆန်းပိုင်းက စတင် မိတ်ဆက်ခဲ့တာ ဖြစ်ပါတယ်။
သမ္မတ ထရန့်က ပညာရေးဝန်ကြီးဌာနကို ပိတ်သိမ်းဖို့ အကြိမ်ကြိမ် တောင်းဆိုထားပြီး ကြီးကြီးမားမား လိမ်လည်နေတဲ့ အလုပ်လို့ ပြောဆိုထားပါတယ်။
အဲဒီဝန်ကြီးဌာနကို ထရန့်က သူ့ရဲ့ ပထမ ရာထူးသက်တမ်းအတွင်း ပိတ်သိမ်းဖို့ အဆိုပြုခဲ့ပေမယ့် လွှတ်တော်က လိုက်ပါ ဆောင်ရွက်မှု မရှိခဲ့ပါဘူး။
သူ့ရဲ့ ရီပက်ဘလေကန်ပါတီဝင် အပေါင်းအပါတွေက ပညာရေးဝန်ကြီးဌာနရဲ့ သြဇာလွှမ်းမိုးမှုနဲ့ ရန်ပုံငွေကို တားဆီးဖို့ ကြိုးပမ်းနေကြတာ ကြာပြီ ဖြစ်ပါတယ်။
WWE နပန်းပြိုင်ပွဲ ပူးတွဲတည်ထောင်သူ အမှုဆောင်အရာရှိဟောင်း မက်မာဟွန်က ထရန့်ရဲ့ ဌာန ပိတ်သိမ်းမယ့် အစီအစဉ်ကို ကန့်ကွက်ထားပေမယ့် ဝင်ငွေနည်းပါးတဲ့ ကျောင်းတွေနဲ့ ကျောင်းသားဆက်လက် ပညာသင်ကြားနိုင်ရေး လွှတ်တော်က သင့်တော်သလို ရန်ပုံငွေ ရရှိအောင် ဆောင်ရွက်ပေးမယ်လို့ ကတိပြုထားပါတယ်။
ကျောင်းသားတွေအတွက် ချေးငွေတွေနဲ့ မသန်စွမ်းကလေးတွေအတွက် ဝန်ဆောင်မှုတွေကို ဥပဒေအဖြစ် တစ်ပေါင်းတစ်စည်းတည်း ပြဌာန်းပြီး ဆက်လက် ပေးအပ်သွားမှာ ဖြစ်တယ်လို့ ထရန့်ရဲ့ အထူး ညွှန်ကြားချက်ကို သိထားတဲ့ သတင်းရင်းမြစ်တစ်ခုက ပြောပါတယ်။
ထရန့်နဲ့သူ့ရဲ့ ဘီလျံနာအကြံပေး အီလွန်မက်စ်တို့က အစိုးရအေဂျင်စီတွေနဲ့ စီမံကိန်းတွေကို လွှတ်တော်ရဲ့ ခွင့်ပြုချက် မယူဘဲ ပိတ်သိမ်းဖို့ ကြိုးပမ်းနေပြီး နိုင်ငံတကာဖွံ့ဖြိုးမှု အမေရိကန်အကူအညီပေးရေး အေဂျင်စီကိုလည်း ဖျက်သိမ်းခဲ့ပေမယ့် ပညာရေးဝန်ကြီးဌာနကို ဖျက်သိမ်းတာဟာ ပထမဆုံး ဝန်ကြီးဌာနအဆင့် အေဂျင်စီကို ဖျက်သိမ်းမှု ဖြစ်လာမှာ ဖြစ်ပါတယ်။
Ref:Reuters
