လာမည့်နှစ်ကစပြီး ထိုင်းကို e-Visa လျှောက်ထားနိုင်မည်
ဇန်နဝါရီလက စတင်၍ မြန်မာနိုင်ငံသားများအနေဖြင့် ထိုင်းနိုင်ငံကို ဗီဇာလျှောက်ထားရာတွင် အွန်လိုင်း(e-Visa) စနစ်ဖြင့်စတင်လျှောက်ထားနိုင်မည်ဟု ရန်ကုန်မြို့အခြေစိုက် ထိုင်းသံရုံးက ယမန်နေ့ (ဒီဇင်ဘာ ၁၂ ရက်နေ့)ကထုတ်ပြန်သည်။
ယင်းစနစ်ကို မြန်မာနိုင်ငံသားများအပြင် မြန်မာနိုင်ငံအတွင်း လာနေထိုင်နေသည့် တခြားနိုင်ငံသားများလည်း လျှောက်ထားနိုင်ကြောင်း သိရသည်။
ထိုသို့ e-Visa စနစ် အပြောင်းအလဲပြုလုပ်ရန်အတွက် ဒီဇင်ဘာ ၂၅ ရက်နေ့မှ ၃၁ ရက်နေ့အထိ ဗီဇာလျှောက်လွှာများကို လက်ခံမည် မဟုတ်သေးကြောင်းလည်း ထိုင်းသံရုံးက ကြေညာထားသည်။
ဗီဇာလျှောက်လွှာများကို စိစစ်အကဲဖြတ်ချိန်သည် ၁၀ ရက်မှ ၁၅ ရက်ကြာမြင့်နိုင်ကာ ဗီဇာကြေးကို ထိုင်းသံရုံးဗီဇာကောင်တာ၌ ချိန်းဆိုသည့် ရက် လာရောက်ပေးသွင်းရမည် ဖြစ်ကြောင်းလည်း သိရသည်။
လျှောက်ထားရာ၌ စာရွက်စာတမ်းမပြည့်စုံခြင်းနှင့် အတုအပပြုလုပ်လျှောက်ထားသည့် ဗီဇာလျှောက်လွှာများကို ပယ်ဖျက်သွားမည်ဖြစ်ကြောင်းလည်း ကြေညာထားသည်။
e-Visa စနစ် အပြောင်းအလဲမပြုခင် ယခင်ကတော့ ဗီဇာလျှောက်ထားမည့်ရက်ကိုစာ အွန်လိုင်းမှတစ်ဆင့် ကြိုတင်ရက်ချိန်းယူရခြင်း ဖြစ်ကြောင်း သိရသည်။
