ဆီးရီးယားဘက်က ခြိမ်းခြောက်မှုတွေကြောင့် ဂိုလန်ကုန်းမြင့်ဒေသမှာ လူဦးရေနှစ်ဆတိုးမြှင့်ချထားဖို့ အစ္စရေးစီစဉ်
နိုင်ငံတကာ၊ ဒီဇင်ဘာ ၁၆
ဆီးရီးယားနိုင်ငံမှာ ပြီးခဲ့တဲ့သီတင်းပတ်က သမ္မတဘရှားအယ်လ်အာဆတ်ကို ဖြုတ်ချခဲ့တဲ့ သူပုန်ခေါင်းဆောင်တွေက အလယ်အလတ်လေသံတွေပြောနေပေမဲ့ ဆီးရီးယားရဲ့ ခြိမ်းခြောက်မှုတွေ ရှိနေသေးဆဲဖြစ်ကြောင်းပြောကြားရင်း သိမ်း ပိုက်ခံဂိုလန်ကုန်းမြင့်ဒေသမှာ လူဦးရေနှစ်ဆတိုးမြှင့် နေရာချသွားဖို့ စီစဉ်ထားကြောင်း အစ္စရေးအစိုးရက ဒီဇင်ဘာ ၁၆ ရက်နေ့က ပြောကြားလိုက်ပါတယ်။
“ဂိုလန်တောင်ကုန်းကို အားဖြည့်တာဟာ အစ္စရေးနိုင်ငံတော်ကို အားဖြည့်တာပဲဖြစ်တယ်။ အခုအချိန်မှာ အထူးအရေး ကြီးပါတယ်။ ကျွန်တော်တို့ ဂိုလန်တောင်ကုန်းကို ဆက်လက်ထိန်းချုပ်ထားရမှာဖြစ်တယ်။ အဲဒီဒေသ ဖွံ့ဖြိုးဝေဆာလာ အောင်ဆောင်ရွက်ပြီး အခြေချနေထိုင်သွားမှာဖြစ်တယ်။” လို့ ဝန်ကြီးချုပ် ဘင်ဂျမင်နတန်ယာဟုက ကြေညာချက်ထဲမှာ ထည့်သွင်းပြောကြားထားပါတယ်။
အစ္စရေးဟာ မဟာဗျူဟာမြောက်နေရာတစ်ခုဖြစ်တဲ့ ဂိုလန်ကုန်းမြင့်ဒေသ အစိတ်အပိုင်းအများစုကို ၁၉၆၇ ခြောက်ရက် စစ်ပွဲကာလအတွင်း ဆီးရီးယားထံကသိမ်းယူခဲ့ပြီး ၁၉၈၁ ခုနှစ်မှာ ဂိုလန်ကုန်းမြင့်ဒေသတစ်ခုလုံးကို သိမ်းပိုက်ခဲ့ပါတယ်။
၂၀၁၉ ခုနှစ်က အဲဒီအချိန်က အမေရိကန်သမ္မတဒေါ်နယ်ထရမ့်က ဂိုလန်ကုန်းမြင့်ဒေသအပေါ် အစ္စရေးရဲ့ အချုပ်အခြာ ပိုင်ဆိုင်မှုကို အသိအမှတ်ပြုထောက်ခံခဲ့ပေမဲ့ နိုင်ငံအများစုကတော့ ဂိုလန်တောင်ကုန်းကို အစ္စရေးသိမ်းပိုက်ထားတာကို အသိအမှတ်ပြုခြင်းမရှိပါဘူး။
ဂိုလန်ကုန်းမြင့်ဒေသက အစ္စရေးတပ်တွေ ပြန်လည်ဆုတ်ခွာပေးဖို့ ဆီးရီးယားဘက်က တောင်းဆိုခဲ့ပေမဲ့ အစ္စရေးက တော့ လုံခြုံရေးအကြောင်းပြချက်နဲ့ ပြန်လည်ဆုတ်ခွာပေးခြင်းမရှိပါဘူး။
ဆီးရီးယားနိုင်ငံက လုံခြုံရေးအခြေအနေတွေနဲ့ ပတ်သက်ပြီး ၎င်းအနေနဲ့ ဒေါ်နယ်ထရမ့်နဲ့ ဒီဇင်ဘာ ၁၄ ရက်နေ့ (စနေနေ့) က ဆွေးနွေးပြောဆိုခဲ့ကြောင်း နတန်ယာဟုက ပြောပါတယ်။
“ကျွန်တော်တို့ ဆီးရီးယားနဲ့ ပဋိပက္ခဖြစ်ဖို့ စိတ်မဝင်စားပါဘူး။ ဆီးရီးယားနိုင်ငံထဲမှာ အစ္စရေးတွေဆောင်ရွက်ခဲ့ တာဟာ ဆီးရီးယားကထွက်ပေါ်လာမယ့် အနာဂတ်ခြိမ်းခြောက်မှုကို ကာကွယ်ဖို့နဲ့ ကျွန်တော်တို့ နယ်စပ်ကို အကြမ်းဖက် အင် အားစုတွေ ရောက်မလာအောင် ကာကွယ်ဖို့ ရည်ရွယ်တာပဲဖြစ်တယ်။” လို့ ၎င်းက ပြောပါတယ်။
သူပုန်အုပ်စုခေါင်းဆောင်တွေက အလယ်အလတ်လေသံတွေပြောနေပေမဲ့ ဆီးရီးယားနိုင်ငံက အဖြစ်အပျက် တွေက အစ္စရေးအတွက် ခြိမ်းခြောက်မှုတွေ တိုးမြင့်လာကြောင်း အစ္စရေးကာကွယ်ရေးဝန်ကြီး အစ္စရေး ကတ်ဇ်ကလည်း ထုတ် ပြန်ချက်ထဲမှာ ပြောပါတယ်။
ဂိုလန်ကုန်းမြင့်ဒေသမှာ လူနေထူထပ်လာဖို့အတွက် ဒေါ်လာ ၁၁ သန်းကျော် အသုံးပြုသွားမယ့်ကိစ္စကို အစိုးရက တညီ တညွတ်တည်း သဘောတူခွင့်ပြုခဲ့ကြောင်း နတန်ယာဟုရုံးက ပြောပါတယ်။
ဆော်ဒီအာရေးဘီးယား၊ ကာတာနဲ့ ယူအေအီးနိုင်ငံတို့က အစ္စရေးရဲ့ ဆုံးဖြတ်ချက်ကို ပြင်းပြင်းထန်ထန် ပြစ်တင်ရှုတ်ချ လိုက်ပါတယ်။
၂၀၂၀ ပြည့်နှစ်မှာ အစ္စရေးနဲ့ ပုံမှန်ဆက်ဆံရေး ပြန်လည်ထူထောင်ခဲ့တဲ့ ယူအေအီးနိုင်ငံက အစ္စရေးနိုင်ငံဟာ သိမ်းပိုက် ထားမှုကို နယ်မြေချဲ့ထွင်ဖို့အတွက် ရည်ရွယ်ချက်ရှိရှိ ဆောင်ရွက်နေတာဖြစ်တယ်လို့ ပြောဆိုလိုက်ပါတယ်။
ဂိုလန်ကုန်းမြင့်ဒေသမှာ အစ္စရေးလူမျိုး ၃၁,၀၀၀ နဲ့ အာရပ်လူမျိုး ၂၄,၀၀၀ ဝန်းကျင် စုစုပေါင်းလူဦးရေ ၅၅,၀၀၀ နေထိုင် ကြရာ အာရပ်အများစုဟာ ဆီးရီးယားတွေဖြစ်ပါတယ်။
ဂိုလန်ကုန်းမြင့်ဒေသခံတွေဟာ စပျစ်ခြံစိုက်ပျိုးရေးအပါအဝင် လယ်ယာစိုက်ပျိုးရေးလုပ်ငန်းတွေနဲ့ ကမ္ဘာလှည့်ခရီးသွား လုပ်ငန်းတွေ လုပ်ကိုင်ဆောင်ရွက်ကြပါတယ်။
Ref: Israel plans to double population on occupied Golan, citing threats from Syria
#centralnewsnaypyitaw
