အချစ်နှင့် တွေ့ခဲ့သည်၊ သို့သော်…
A Walk to Remember ဆိုတဲ့ ဆယ်ကျော်သက် အချစ်ဇာတ်လမ်းလေးကို ကြည့်ရတာ ကြည်နူးဖို့ကောင်းသလို ဝမ်းနည်းဖို့လည်း ကောင်းပါရဲ့။ ဆယ်ကျော်သက်ဆိုတဲ့ အရွယ်က ဖြူစင်တဲ့ နှလုံးသားတွေနဲ့ အချစ်ကို ပထမဆုံး စတင်ထိတွေ့ ခံစားကြတဲ့ အချိန်တွေလေ။
ပြီးတော့ ဆယ်ကျော်သက်တွေဆိုတာက လေတိုက်လို့ သစ်ပင်ကလေး လှုပ်ခတ်သွားရင်၊ လေအဝှေ့မှာ သစ်ရွက်ကလေးတွေ ကြွေကျသွားရင်တောင် စိတ်ကူယဉ်လို့ မဆုံးတဲ့ အရွယ်တွေ မဟုတ်လား။ ဒီအရွယ်မှာပဲ အချစ်ကို ပထမဦးဆုံး တမ်းတကြ၊ အချစ်ဦးတွေနဲ့ ဆုံတွေ့ကြ ပြီးတော့ ဘယ်တော့မှ ပြန်မဆုံမယ့် လမ်းတွေဆီ ခွဲခွာကျောခိုင်းပြီး လျှောက်လမ်းခဲ့ရတဲ့ အချိန်တွေပေါ့။ တစ်နည်းပြောရရင် ချစ်ခြင်းတရားဆိုတာ ဘာလဲရယ်၊ ခွဲခွာခြင်းက ဘာလဲဆိုတာတွေရယ် သင်ယူခဲ့ရတဲ့ အချိန်တွေပါပဲ။
၂၀၀၂ ခုနှစ်မှာ ထွက်ခဲ့တဲ့ ကျောင်းသားအချစ်ဇာတ်ကားလေး ဖြစ်တဲ့ A Walk to Remember က ကြည့်မိသူတိုင်းကို ကုန်လွန်သွားပြီဖြစ်တဲ့၊ ပြန်မရနိုင်တော့တဲ့ ဆယ်ကျော်သက်ဘဝကို အခိုက်အတန့်အားဖြင့် ခေါ်ဆောင်သွားစေမှာပါ။
ရုပ်ရှင်ရဲ့ ဇာတ်လမ်းလေးက ဒီလို။ အထက်တန်းကျောင်းတစ်ကျောင်းရဲ့ နာမည်ကြီး ခပ်ဆိုးဆိုးကျောင်းသားလေး တစ်ယောက်က ပြဿနာတွေ ပတ်ရှာရင်း ရုံးခန်းထဲ ရောက်သွားတယ်။ ဆရာက အပြစ်ပေးတဲ့ အနေနဲ့ လူမှုပြစ်ဒဏ်ပေးရင်း ကျောင်းက ကတဲ့ ပြဇာတ်မှာ ကခိုင်းပါလေရော။ ပြဇာတ်ကဖို့လုပ်တော့ ကျောင်းရဲ့ အရိုးအေးဆုံး၊ အနေအထိုင် အသိုသိပ်ဆုံး ကောင်မလေးတစ်ယောက်နဲ့ ဆုံမိသွားတယ်။ ကောင်လေးက ခပ်ဆိုးဆိုး၊ လူမိုက်လေး။ ကောင်မလေးက ဘာသာတရား ကိုင်းရှိုင်းတဲ့ ရိုးရိုးအေအေးလေး။
ဆန့်ကျင်ဘက်အချက်တွေ ကိုယ်စီ ကိုယ်စီပိုင်ဆိုင်ထားတဲ့ ဒီနှစ်ယောက်ကြားမှာ စိတ်ကြည်နူး ချမ်းမြေ့ဖို့လည်းကောင်း၊ လွမ်းဆွတ်တမ်းတ ဝမ်းနည်းဖို့လည်းကောင်းတဲ့ အချစ်ဇာတ်လမ်းလေး တစ်ပုဒ် ပေါ်ပေါက်လာတယ်။ ဒါက သိပ်ကို ရိုးရှင်းတဲ့ A Walk To Remember ရုပ်ရှင်ရဲ့ ဇာတ်လမ်း ဖြစ်ပါတယ်။ ဒါပေမဲ့ ဇာတ်လမ်းက ရိုးရှင်းသလောက် ဆွဲဆောင်မှု သိပ်ရှိတယ်။ ထိုင်ရာက မထတမ်း ကြည့်မိတဲ့အထိကို သဘောကျဖို့ကောင်းတယ် ပြောရမယ်။
ဆယ်ကျော်သက် အရွယ်တုန်းက ပိုင်ဆိုင်ခဲ့ရတဲ့ ပေါ့ပါးလွတ်လပ်မှုတွေ၊ ငယ်ရွယ်နုပျိုမှုတွေနဲ့ အချစ်ကို ပထမဦးဆုံး ခံစားမိတဲ့ အခိုက်အတန့်ဆီကို ခေါ်ဆောင်သွားမယ့် A Walk To Remember ရုပ်ရှင်ကို ပရိသတ်တွေ ကြည့်ရှုခံစားနိုင်ဖို့ လက်တို့လိုက်ပါတယ်။
