သံတွဲမြို့ကို ထပ်မံ ဗုံးကြဲမှုကြောင့် ဒေသခံ ၁ ဦးသေ၊ ၆ ဦးဒဏ်ရာရ
DMG ၊ ဒီဇင်ဘာ ၂၄
ရခိုင်ပြည်၊ သံတွဲမြို့ကို စစ်ကောင်စီက လေကြောင်းဗုံးကြဲတိုက်ခိုက်မှုကြောင့် ဒေသခံတစ်ဦးသေဆုံးပြီး ၆ ဦး ဒဏ်ရာရရှိသွားခဲ့ကြောင်း သတင်းရရှိသည်။
ဒီဇင်ဘာ ၂၃ ရက် ညနေပိုင်းအချိန် ဂျက်တိုက်လေယာဉ်ဖြင့် လေးကြိမ်တိုင်တိုင် လာရောက်ဗုံးကြဲသွား၍ ညောင်ပင်ဈေးရပ်ကွက်နှင့် သမုတ်ချောင်းကျေးရွာတွင် ကျရောက်ပေါက်ကွဲကာ ဒေသခံများ ထိခိုက်သေဆုံးခဲ့ခြင်း ဖြစ်သည်။
“မနေ့က ညနေ ၃ နာရီကျော်လောက်မှာ ဂျက်နဲ့လာကြဲတာ။ ညောင်ပင်ဈေးရပ်ကွက်နဲ့ သမုတ်ချောင်းရွာ နှစ်နေရာကို ကြဲသွားတာ။ သေနတ်ပစ်သံတွေလည်း ကြားရတယ်။ ဒေသခံတစ်ယောက်သေတယ်” ဟု မြေပြင် သတင်းရင်းမြစ်တစ်ဦးက ပြောသည်။
ဗုံးကြဲမှုအတွင်း ညောင်ပင်ဈေးရပ်ကွက်မှ အသက် (၄၀)အရွယ် ဦးဖိုးကျော်မှာ ပွဲရှင်းပြီးသေဆုံးသွားပြီး ဒေါ်ခင်ခင်နွယ်၊ ဦးသန်းဝင်း၊ ဒေါ်မလုံးတို့မှာ ဒဏ်ရာရရှိသွားကာ သမုတ်ကျေးရွာမှ ဦးအောင်သိန်းတင်၊ ဒေါ် အေးအေးသန်းနှင့် ဒေါ်နွယ်နွယ်တို့ဒဏ်ရာရရှိသွားသည်။
သံတွဲမြို့ကို စစ်ကောင်စီက လေကြောင်းဗုံးကြဲမှု ဆက်တိုင်းလုပ်ဆောင်နေပြီး ဒီဇင်ဘာ ၁၇ ရက်မှ ၂၃ ရက်အတွင်း သုံးကြိမ်တိုင်တိုင်ရှိကာ အရပ်သား ၁၁ ဦးထိ ထိခိုက်သေဆုံးခဲ့ရသည်။
“မြို့ထဲကို ခဏခဏပြီး လေယာဉ်နဲ့ချနေတော့ မြို့ထဲဝင်နေတဲ့ လူတွေထဲက တချို့ဆို မနေရဲလို့ ပြန်ထွက် ကုန်ကြပြီ။ အခုအရှိနေတဲ့သူတွေလည်း ကြောက်ကြောက်လန့်လန့်နဲ့နေနေကြရတယ်” ဟု ဒေသခံ အမျိုးသမီး တစ်ဦးက ပြောသည်။
ရခိုင်ဒေသအတွင်း စစ်ရှုံးနေသော စစ်ကောင်စီသည် အရပ်သားနေထိုင်ရာမြို့/ရွာများကို လေကြောင်းဗုံးကြဲတိုက် ခိုက်မှုလုပ်ဆောင်နေ၍ သေဆုံးဒဏ်ရာရရှိသူ လစဉ်တိုးလျက်ရှိသည်။
ဓာတ်ပုံ - APM
#crd_photo
