တာမွေတွင် ဆီအပြည့်သယ်လာသော ဆီဘောက်ဆာယာဉ် ဘရိတ်ပေါက်၍ လက်ဖက်ရည်ဆိုင်ကို ဝင်တိုက်ရာမှ လမ်းသွားလမ်းလာနှစ်ဦး ဒဏ်ရာရ
ဒီဇင်ဘာ ၂၄
ဂါလံ ၂၈၀၀ ဆံ့ ဆီဘောက်ဆာမောင်းနှင်လာစဉ် ဘရိတ်ပေါက်၍ ရသာစုံ လက်ဖက်ရည်ဆိုင်ကို ဝင်တိုက်ပြီး လမ်းသွားလမ်းလာသူ နှစ်ဦးဒဏ်ရာရခဲ့ရာ အမျိုးသမီးတစ်ဦးမှာ အသက်အန္တရာယ် စိုးရိမ်ရမှု ရန်ကုန်တိုင်းဒေသကြီး၊ တာမွေမြို့နယ်၊ နတ်ချောင်းရပ်ကွက်၊ သမိန်ဗရမ်းလမ်းနှင့် ပွဲစားတန်းလမ်းထောင့်တွင် ဒီဇင်ဘာလ ၂၃ ရက် ညနေ ၅နာရီ ၅၅ မိနစ်ခန့်က ဖြစ်ပွားခဲ့ကြောင်း ကယ်ဆယ်ရေးဆောင်ရွက်သူများထံမှ သိရသည်။
ဆီအပြည့်သယ်လာသော ဒီဇယ် ဂါလံ ၂၈၀၀ ဆံ့ ဆီဘောက်ဆာယာဉ်မှာ ကြက်ဘဲဈေးဘက်မှ တာမွေဗလီဘက်သို့ မောင်းနှင်လာစဉ် ရသာစုံလက်ဖက်ရည်ဆိုင် မျက်နှာစာရှိ ကျောက်ထုပ်ကို ဝင်တိုက်ခဲ့ခြင်း ဖြစ်ပြီးနောက် ၂ ခန်းတွဲ၊ ၈ ထပ်တိုက်၏ ဘယ်ဘက်နံရံကို ထပ်မံဝင်တိုက်ခဲ့ကြောင်း သိရသည်။
ယာဉ်တိုက်မှုကြောင့် လမ်းသွားလမ်းလာများဖြစ်သော အသက် ၂၀ အရွယ် ကိုထက်ဝင်းမိုရ်တွင် မျက်ခုံးကွဲခြင်း၊ ညာဖက်ခြေထောက်ပွန်းပဲ့ဒဏ်ရာရရှိခဲ့ပြီး အသက် ၄၂ အရွယ် အမျိုးသမီး ဒေါ်ခိုင်ခိုင်မာတွင်မူ ဦးခေါင်းနောက်စေ့ပေါက်ပြဲဒဏ်ရာ ရရှိခဲ့ရာ အသက်အန္တရာယ် စိုးရိမ်ရကြောင်း သိရသည်။
ယာဉ်တိုက်မှုကြောင့် ဆီဘောက်ဆာယာဉ်ခေါင်းပိုင်းကြေမွခဲ့ပြီး တင်ဆောင်လာသော ဒီဇယ်ဂါလံ ၂၈၀၀ ကို အခြား ဆီဘောက်ဆာယာဉ်ပေါ်သို့ တစ်နာရီကျော်ကြာ ဖလှယ်ခဲ့ရကြောင်းနှင့် အချိန်အတော်ကြာ ယာဥ်ကြောပိတ်ဆို့မှုဖြစ်ပွားခဲ့ကြောင်း သိရသည်။
ဆီဘောက်ဆာယာဉ်တိုက်မှုကို တာမွေမြို့နယ်မီးသတ်စခန်းမှ မီးငြှိမ်းသတ်ယာဉ် ၂ စီး၊ ရှာဖွေကယ်ဆယ်ရေးယာဉ် ၁ စီးနှင့် သန္ဓအရန်မီးသတ်တပ်ဖွဲ့ဝင် ၃၀ ခန့်ဖြင့် သွားရောက်ကူညီပေးခဲ့ကြောင်း သိရသည်။
ဒဏ်ရာရသူနှစ်ဦးကို မြန်မာမွတ်စလင်မ် ပရဟိတအဖွဲ့မှ သူနာတင်ယာဉ်၊ ကိုကြီးနှင့် ညီအစ်ကိုများပရဟိတအသင်းမှ သူနာတင်ယာဉ်တို့ဖြင့် ရန်ကုန်ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
ထို့အပြင် ယာဉ်တိုက်မှုဖြစ်သော အသက် ၃၈ နှစ်အရွယ် ဆီဘောက်ဆာယာဉ်မောင်း ဦးသက်ထွန်းဦးကို တာမွေမြို့မရဲစခန်းတွင် ဥပေဒအရ အရေးယူဆောင်ရွက်လျက်ရှိကြောင်း သိရသည်။
Photo – YRO ၊ မြန်မာမွတ်ဆလင်မ်ပရဟိတအဖွဲ့
Credit - Myanmar Transparency News Agency
#သတင်းဟင်းလေးအိုးကြီး
+5
