နီပေါနိုင်ငံတွင် ကျင်းပသည့် ဖိတ်ခေါ်ဘောလုံးပြိုင်ပွဲတွင် ချန်ပီယံဆုဆွတ်ခူးခဲ့သည့် မြန်မာ့လက်ရွေးစင်အမျိုးသမီးအသင်း ယနေ့နံနက်ပိုင်းတွင် အမိမြေသို့ ပြန်လည်ရောက်ရှိလာပြီး ကျပ် သိန်း ၆၉၀ ဖြင့် ဂုဏ်ပြုကြိုဆို
ဖေဖော်ဝါရီ ၂၈
နီပေါနိုင်ငံ၊ ခတ္တမန္ဒုမြို့ရှိ ဒါရှာရတ်ကွင်းတွင် ဖေဖော်ဝါရီ ၁၇ မှ ၂၆ ရက်အထိ ကျင်းပသည့် လေးနိုင်ငံ အမျိုးသမီး ဖိတ်ခေါ်ပြိုင်ပွဲ ဗိုလ်လုပွဲတွင် အိမ်ရှင်နီပေါအသင်းကို နှစ်ဂိုးပြတ်အနိုင်ရကာ ချန်ပီယံဆု ဆွတ်ခူးနိုင်ခဲ့သည့် မြန်မာ့လက်ရွေးစင် အမျိုးသမီးအသင်း အမိမြေသို့ ယနေ့နံနက်တွင် ပြန်လည်ရောက်ရှိလာခဲ့သည်။
အောင်ပွဲရ မြန်မာ့လက်ရွေးစင် အမျိုးသမီးအသင်းကို ရန်ကုန်တိုင်းဒေသကြီးဝန်ကြီးချုပ်ဦးစိုးသိန်းနှင့် အစိုးရအဖွဲ့ဝင်များ၊ အားကစားနှင့်လူငယ်ရေးရာဝန်ကြီးဌာန တာဝန်ရှိသူများ၊ မြန်မာနိုင်ငံဘောလုံးအဖွဲ့ချုပ်ဥက္ကဋ္ဌ ဦးဇော်ဇော်နှင့် တာဝန်ရှိသူများက ဂုဏ်ပြုကြိုဆိုခဲ့ပြီး အောင်ပွဲရ မြန်မာ့လက်ရွေးစင် အမျိုးသမီးအသင်းကို လေဆိပ်တွင်ပင် ကျပ်သိန်း ၆၉၀ ဖြင့် ဂုဏ်ပြုခဲ့သည်။
အဆိုပါ လေးနိုင်ငံဖိတ်ခေါ် ပြိုင်ပွဲသို့ အိမ်ရှင် နီပေါအသင်း၊ မြန်မာအသင်း၊ ကာဂျစ္စတန်အသင်း၊ လက်ဘနွန်အသင်းတို့ ပါဝင်ယှဉ်ပြိုင်ခဲ့ပြီး ၄ သင်း ပတ်လည်စနစ်ဖြင့် ကစားခဲ့ရာ မြန်မာ့လက်ရွေးစင် အမျိုးသမီးအသင်းသည် ဖေဖော်ဝါရီ ၁၇ ရက်တွင် လက်ဘနွန်အသင်းကို သုံးဂိုး တစ်ဂိုး၊ ဖေဖော်ဝါရီ ၂၀ ရက်တွင် ကာဂျစ္စတန်အသင်းကို ငါးဂိုး ဂိုးမရှိနှင့် ဖေဖော်ဝါရီ ၂၃ ရက်တွင် အိမ်ရှင် နီပေါအသင်းကို ၂ ဂိုးစီသရေဖြင့် ယှဉ်ပြိုင် ကစားပြီးနောက် အမှတ်အများဆုံးရရှိသည့် မြန်မာနှင့် နီပေါ ထိပ်ဆုံးနှစ်သင်းမှာ ဖေဖော်ဝါရီ ၂၆ ရက်တွင် နောက်ဆုံး ဗိုလ်လုပွဲအဖြစ် ယှဉ်ပြိုင်ကစားခဲ့သည်။
ဗိုလ်လုပွဲ၏ ပထမပိုင်းတွင် မြန်မာအသင်းမှာ နီပေါအသင်း၏ အိမ်ရှင်ဖိအားအောက် ဂိုးမရှိသရေကျခဲ့သော်လည်း ဒုတိယပိုင်းစပြီးမကြာမီ ၆၁ မိနစ်တွင် ရူပါခိုင်က မြန်မာအမျိုးသမီးအသင်းအတွက် ဦးဆောင်ဂိုးကို တစ်ကိုယ်တော်အစွမ်းဖြင့် သွင်းယူခဲ့ပြီး နှစ်မိနစ်အကြာ အသင်းခေါင်းဆောင် ဝင်းသိင်္ဂီထွန်းက သွင်းယူသည်ကို နီပေါနောက်ခံလူများ တားဆီးရာမှ ကိုယ့်ဂိုးကိုယ် သွင်းမိခဲ့ခြင်းဖြစ်သည်။ ထိုဂိုးမှာ အငြင်းပွားဖွယ်ဖြစ်သော်လည်း အားကစားသတင်းဌာနများကမူ ဝင်းသိင်္ဂီထွန်း၏ သွင်းဂိုးအဖြစ် ဖော်ပြခဲ့သည်။
မြန်မာ့လက်ရွေးစင် အမျိုးသမီးအသင်းသည် ယခုနှစ်အတွင်း ယှဉ်ပြိုင်ရမည့် နိုင်ငံတကာ ပြိုင်ပွဲများအတွက် ပြီးခဲ့သည့်နှစ် ဒီဇင်ဘာ လလယ်ပိုင်းကတည်းက စခန်းဝင်လေ့ကျင့်လျက်ပြီး ပြိုင်ပွဲအကြို ပြင်ဆင်မှုအနေဖြင့် နီပေါ ဖိတ်ခေါ်ဘောလုံးပြိုင်ပွဲသို့ ဝင်ရောက် ယှဉ်ပြိုင်ခြင်းဖြစ်သည်။
မြန်မာ့လက်ရွေးစင် အမျိုးသမီးအသင်းသည် ယခုနှစ်အတွင်း အာဆီယံ အမျိုးသမီး ချန်ပီယံရှစ်ပြိုင်ပွဲ၊ အာရှဖလား အမျိုးသမီး ခြေစစ်ပွဲနှင့် (၃၃) ကြိမ်မြောက် ထိုင်းဆီးဂိမ်းစ ပြိုင်ပွဲ ယှဉ်ပြိုင်ရမည်ဖြစ်သည်။
#centralnewsnaypyitaw
