ထင်မှတ်မထားတဲ့ အိန္ဒိယအက်ရှင်ရုပ်ရှင်များ | (Kill) (Marco)
ဒီနှစ်ပိုင်းထဲမှာ အိန္ဒိယရုပ်ရှင်လောကရဲ့ action genre မှာ လုံးဝမထင်ထားတဲ့ action ရုပ်ရှင်နှစ်ကားကို ရှားရှားပါးပါးတွေ့ခဲ့ရတယ်။
ဘာလို့ဒီလိုပြောရလဲဆိုရင် များသောအားဖြင့် အိန္ဒိယရဲ့အက်ရှင်ရုပ်ရှင်အများစုက ပရိသတ်အပေါ်မူတည်ပြီးတော့ရိုက်တာဆိုတော့ မလိုအပ်တဲ့ masala တွေ အများကြီးပါတဲ့အပြင် shot တွေတိုင်းလိုလိုမှာ protagonist (ဟီးရိုး)ကို အဓိကထားပြီး ရိုက်ပြတတ်တယ်၊ ဥပမာ Jailer မှာ Rajinikanth ရဲ့ မျက်မှန်တပ်တဲ့ pose ကို ပိုပြီးမြင်အောင်ပြထားတာမျိုးပေါ့။
၂၀၂၄ ထဲမှာ အဲဒီ pose တွေကနေ ဖောက်ထွက်သွားတဲ့ action ရုပ်ရှင်နှစ်ကားကို မထင်မှတ်ပဲနဲ့ တွေ့ခဲ့ရတယ်။ ပထမတစ်ကားက Hindi ရုပ်ရှင် Kill, နောက်တစ်ခုက Malayalam ရုပ်ရှင် Marco. Kill ကို ပထမဆုံးသတိထားမိတာက Dharma Production ကနေပြလာတဲ့ first poster မှာပေါ့။ အဲဒီ production က အိန္ဒိယရဲ့အကောင်ကြီးကြီး Production ထဲမှာပါတယ်၊ Star Kid တွေရဲ့ ခေါင်းကိုင်ဖခင်ကြီး Karan Johar ရဲ့ production ဆိုတော့ Kill ကို သာမန်ပါပဲ ဆိုပြီးပစ်ထားခဲ့တယ်။ ဒါပေမယ့် နောက်ကျ International Distribution ကို Lionsgate က တာဝန်ယူထားပြီး Lionsgate ရဲ့ YouTube မှာ Kill ကို trailer ပြလာတော့ကျမှ ဒီရုပ်ရှင်က Hindi action ရုပ်ရှင်အနေနဲ့ဆိုရင် တော်တော်အဆင့်မြင့်တဲ့အထဲမှာပါတယ်ဆိုတာကို သတိထားမိတာပါပဲ။
အိန္ဒိယမှာ revenge drama, revenge action thriller တွေက တော်တော်ပေါပေါများများရှိတယ်။ ဒါပေမယ့် ရိုးရှင်းတဲ့ဇာတ်ကွက်နဲ့ လှပတဲ့အက်ရှင်ခန်းတွေကိုသုံးမယ့်အစား plot twist တွေ တသီကြီးသုံးတဲ့ action တွေများလွန်းတယ်။ ဥပမာပြရရင် Tony Jaa ရဲ့ Ong Bak လို ဘုရားဆင်းတုခိုးခံရတာကို ပြန်လုရတဲ့ဇာတ်လမ်းရိုးရိုးလေးကိုမှ အက်ရှင်ခန်းကောင်းကောင်းနဲ့ ရိုက်ပြခဲ့တာမျိုး၊ Ong Bak မှာ ဓာတ်ဆီဆိုင်က ဖိုက်တင်ခန်းမျိုးက လက်ရှိ ကမ္ဘာ့အက်ရှင်ရုပ်ရှင်တွေရဲ့ အကောင်းဆုံး action ခန်းထဲမှာ အခုထိရှိနေသေးတယ်။
Kill မှာလဲ ရိုးတယ်၊ စုံတွဲတစ်တွဲ ရထားစီးရင်းနဲ့ ရထားကို ဓားပြဝင်တိုက်တာကနေ မင်းသားက ဓားပြတွေကို သမတယ်။ ဒါပဲ။ ဒါဆိုဘာလို့ အဲလောက်ထိ ညွှန်းနေရတာလဲဆိုရင် action scene တွေက ပုံမှန် အိန္ဒိယအက်ရှင်ကားတွေမှာတွေ့မြင်နေကျလိုမဟုတ်ပဲ အရမ်းမြန်ဆန်လွန်းတဲ့အပြင် မြင်ဖူးနေကျ သွေးထွက်သံယိုပုံစံတွေကနေ လုံးဝကွဲထွက်နေလို့ပါပဲ။
နောက်ထပ်ပြောရရင် Kill မှာ antagonist နဲ့ protagonist က အရမ်းမျှတယ်၊ ဇာတ်သိမ်းကိုကြိုသိပေမယ့် ဒီနှစ်ယောက်ကနေဖြစ်လာတဲ့ climax က ပရိသတ်တွေကြိုက်နေစေမယ့် အက်ရှင်ပြကွက်တွေကို အများကြီးထုတ်ပြနိုင်ခဲ့တာကို တွေ့ခဲ့ရတယ်။
Marco ကျတော့ ဘာလို့သဘောကျရလဲဆိုရင် အသစ်အဆန်းတွေကို ဖောက်ထွက်တတ်တဲ့ industry ရဲ့ မတူညီတဲ့ပြကွက်တွေပါလို့ပဲ။ သွေးထွက်သံယိုအများဆုံးပြတဲ့ရုပ်ရှင်တွေမှာ အရင်ကဆိုရင် အာရှမှာ ကိုရီးယားနဲ့ ဟောင်ကောင်ပြီးရင် အင်ဒိုနီးရှားနဲ့ ထိုင်းက လိုက်လာတယ်၊ ဥရောပမှာဆိုရင် ဒိန်းမတ်၊ ပြင်သစ်နဲ့ ပိုလန်ဒါရိုက်တာတွေက လက်စွမ်းပြတတ်တယ်။ Malayalam ရုပ်ရှင်လောကက အိန္ဒိယရဲ့ တခြား industry တွေနဲ့မတူပဲ အမြဲအသစ်အဆန်းတွေဖန်တီးတတ်သလို အခုပြောင်းလဲနေပါတယ်ဆိုတဲ့ Tamil ရုပ်ရှင်တွေထက်တောင် Malayalam ရုပ်ရှင်တွေက creative ပိုဖြစ်တယ်။
Marco ကို ပရိသတ်က ဘာလို့သဘောကျလဲလို့ပြောရရင် one shot fight scene နဲ့ Cyrus ရဲ့ ကလဲ့စားချေတဲ့ဇာတ်ဝင်ခန်းက ပိုပြီးအက္ခရာကျလို့ပါပဲ။ မြင်ရခဲတဲ့ revenge scene တွေက Marco ကို ပိုပြီးလူသိများစေတာပေါ့။ ဥပမာ The Untold Story ကလို violence မျိုးကို Marco မှာ ပြန်ခံစားမိတယ်။
ဒါပေမယ့် Marco က အရမ်းအဆုံးသတ်ပေါလွန်းတယ်လို့ပြောရမှာပဲ၊ မလိုအပ်ပဲ အဖျားရှုးသွားတော့ကျ ရှေ့မှာကောင်းထားသမျှက သိပ်အရာမထင်ခဲ့တော့ လိုသလောက်မရောက်ခဲ့ဘူး။ Cyrus နဲ့ Tony လို antagonist မျိုးက Marco တင်မကပဲ တခြား revenge action တွေမှာ မြင်သင့်တဲ့ ရုပ်ရှင်ဇာတ်ကောင်မျိုး၊ ဒါပေမယ့် အဖျားရှူးတာတွေရှိတော့ လိုသလောက်မရောက်ခဲ့တာပါပဲ။
Ravi Basur ရဲ့ နောက်ခံတေးတွေကလဲ Marco ကို ပိုပြီးကြွတက်လာခဲ့တော့ကျ အဖျားရှူးတာက သိပ်တော့မသိသာတော့ဘူး။
ဆိုတော့ ပြောရရင် Kill နဲ့ Marco က ဒီနှစ်ထဲမှာတွေ့ရတဲ့ အိန္ဒိယရုပ်ရှင်လောကရဲ့ action genre မှာ လုံးဝမထင်ထားတဲ့ ရှားရှားပါးပါး action ရုပ်ရှင်နှစ်ကားပါပဲ။
