နေညိုညို - ပီမိုးနင်း
" မင်္ဂလာဆောင်ခြင်းဆိုတာ အချစ်သင်္ချိုင်းဖြစ်ပါတယ် လင်မယားရယ်လို့ဖြစ်သွားရင် အချစ်ဟာ
ရိုးပြီးအခုချစ်သမျှတွေဟာ မြေမြှုပ်သင်္ဂြိုဟ်ခြင်း
ခံရတာလို ပျောက်ပျက်ပြီး ငြီးငွေ့သွားမှာကို
စိုးပါတယ် "
ဆရာကြီး ပီမိုးနင်းရဲ့ နေညိုညို ။ နေရီရီ ကိုသိရင် အလိုလိုတွဲသိနေတတ်တဲ့ စာအုပ်ပါ ။ ဝတ္ထုဆန်တဲ့ မြန်မာဝတ္ထုတွေကို လမ်းစသစ်ဖွင့်ပေးခဲ့တဲ့ စာအုပ်လို့ နာမည်ကြီးပြီး နှစ် ၁၀၀ မြန်မာဝတ္ထု ၁၀၀ ထဲပါတဲ့ စာအုပ်ပါပဲ ။
နေရီရီ ဝတ္ထုဟာ မောင်နေဝင်းဆိုတဲ့ အမျိုးသားဇာတ်ကောင်အကြောင်း ဦးစားပေးဖော်ပြပြီး
နေညိုညို ထဲမှာတော့ ညိုညို ဆိုတဲ့ မိန်းကလေးတစ်ယောက်အကြောင်းကို ဦးစားပေးထားတဲ့ဇာတ်လမ်းပါ ။
ညိုညို ဆိုတာ ပြည်မြို့နဲ့ နီးတဲ့ရွာငယ်လေးမှာ မိဘနှစ်ပါးက တိတ်တဆိတ်လာမွေးပြီး ခြံပိုင်ရှင်တွေ လက်ထဲမှာ မွေးဖို့ ထားပစ်ခံခဲ့ရတဲ့မိန်းကလေး ။ မွေးစားဖခင် ရဲ့ မြန်မာစာ ကျမ်းတွေ လင်္ကာတွေဖတ်ပြီး စာပေအရာမှာ ကျွမ်းကျင်နေတဲ့ မိန်းကလေးပေါ့ ။
မွေးစားမိဘတွေရဲ့ သူတို့ သားဖြစ်သူ မောင်နေဦး နဲ့ လက်ထပ်ပေးချင်မှုကို မနှစ်သက်ဘဲ အစ်ကိုလိုသာ ချစ်ပါရစေလို့ ဆိုပြီး သူ့ရဲ့ မျိုးရိုးမိဘတွေအကြောင်း သိချင်နေခဲ့တာ ။
တစ်နေ့တော့ ချစ်ရတဲ့ ခြံကြီးနဲ့ မောင်နေဦး တို့ကို ထားပြီး ရန်ကုန်ကို တက်ခဲ့တယ် ။ ဗဟန်းက ဖွားသီလရှင်တွေနဲ့ နေရင်း သတင်းစာတိုက်တွေကို စာတွေရေးပို့ပြီး အောင်မြင်ဖို့အတွက် ကြိုးစားရုန်းကန်ခဲ့တယ် ။
ဒီမှာ ဆရာပီမိုးနင်းက သူ့ရဲ့ စာပေအမြင်တွေ ခံယူချက်တွေကို ညိုညို့ နေရာကနေ ပြောပြသွားခဲ့တယ် ၊ ရှေးဆရာတွေနဲ့ ထပ်တူရေးနေရင် ဉာဏ်သစ်မတိုးဘဲ ဉာဏ်ဟောင်းချည်းဖြစ်နေမှာပဲတဲ့ ။
စာရေးတဲ့အခါ လင်္ကာပြောင်ဖို့ကိုပဲ အားထုတ်နေရင် မှတ်သားဖို့ အတွေးအခေါ်ဉာဏ်သစ်တွေမပါရင်
စာဖတ်သူတွေ အကျိုးမဲ့ဖြစ်မှာပါတဲ့ ။
ညိုညိုဟာ ဝတ်လုံကိုထွန်းခင် ဆိုတဲ့သူနဲ့တွေ့မှ
အချစ်ဆိုတဲ့ စိတ်တွေပွင့်လန်းပြီး မောင်နှမထက်ပိုတဲ့ စိတ်တွေဖြစ်ခဲ့ရတယ် ၊ ဝတ်လုံကိုထွန်းခင်ကရော ညိုညို့ကို အတည်တကျ လက်ထပ်ပေါင်းသင်းမှာလား ။
မွေးပြီးပစ်ထားခဲ့တဲ့ ညိုညို့ရဲ့ မိဘတွေနဲ့ ပြန်ဆုံတွေ့အုံးမှာလား ။ လူလားမြောက်အောင် ပြုစုပေးခဲ့တဲ့ မောင်နေဦးတို့ဆီ ညိုညို ပြန်သွားအုံးမှာလား ။
လွန်ခဲ့တဲ့ 103 နှစ်နီးပါးက မြန်မာဝတ္ထုတွေရဲ့ ပုံစံ နဲ့ ခေတ်အခြေအနေတစ်ခု ကို တွေ့ရမဲ့ စာအုပ်ပါ။
ကြိုးစားရုန်းကန်မှုကြောင့် အောင်မြင်မှုတွေရရှိသွားတယ်လို့ ဆိုချင်တဲ့ ဝတ္ထုလေးပါ ။ ဖတ်ခါစတော့ ပျင်းစရာကောင်းပေမဲ့ နောက်ပိုင်းမှာ စိတ်ဝင်စားစရာကောင်းအောင် အဖုံးအဖိလေးတွေနဲ့ ရေးထားတာမို့ သိပ်တော့ ပျင်းစရာမကောင်းတော့ပါဘူး ။
ဇာတ်လမ်းအရဆိုရင်တော့ နေရီရီ ကို ပိုသဘောကျပါတယ် ။ စာပေအရေးအသားတွေ အကြောင်းဆိုရင်တော့ နေညိုညို မှာ အတော်လေး ရှင်းပြပြောပြထားပါတယ် ။
