သန်လျင် ကုလားဝဲတံတားအဆင်းမှာ ဆီဘောက်ဆာယာဉ်တစ်စီး မီးလောင်
နိုဝင်ဘာ ၁၉
ရန်ကုန်တိုင်းဒေသကြီး၊ သန်လျင်မြို့နယ်၊ ကုလားဝဲကျေးရွာ၊ အမှတ်(၂)လမ်းမကြီး၊ ကုလားဝဲတံတားအဆင်းမှာ ဆီဘောက်ဆာယာဉ်တစ်စီး ဒီနေ့ နိုဝင်ဘာ ၁၉ ရက် မနက်အစောပိုင်းက မီးလောင်မှု ဖြစ်ပွားခဲ့တယ်လို့ မြန်မာနိုင်ငံ မီးသတ်တပ်ဖွဲ့ထံကနေ သိရပါတယ်။
ဖြစ်စဉ်က ညအိပ်ရပ်နားထားတဲ့ ဆီဘောက်ဆာယာဉ် ပြန်ထွက်ဖို့အလုပ် ကားစက်နှိုးရာက ဘတ္တရီငုတ်ကနေ မီးပွင့်ပြီး အဆိုပါ မီးပွင့်ရာနေရာနဲ့ ဆီထုတ်ပေါက်ဆီယိုစိမ့်ရာနေရာ နီးရာက မီးလောင်ကျွမ်းဆုံးရှုံးမှု ဖြစ်ပေါ်စေခဲ့တာလို့ သန်လျင်မြို့နယ် မီးသတ်ဦးစီးဌာနမှ ဦးစီးအရာရှိ ဦးဇော်မျိုးဝင်းက ပြောပါတယ်။
ဆီဘောက်ဆာယာဉ် မီးလောင်မှုကြောင့် လူနဲ့ မီးသတ်တပ်ဖွဲ့ဝင်တွေ ထိခိုက်မှုမရှိခဲ့ဘဲ မီးလောင်မှုဖြစ်ပွားကြောင်းသတင်းအရ တောင်ပိုင်းခရိုင်မီးသတ်စခန်းမှ LUF-60 ယာဉ်(၁)စီး၊ မီးငြှိမ်းသတ်ယာဉ်(၂)စီး၊ အရှေ့ပိုင်းခရိုင်မီးသတ်စခန်းမှ LUF-60 ယာဉ် (၁)စီး၊ မီးသတ်ရေသယ်ယာဉ်(၁)စီး၊ သန်လျင်မြို့နယ်မီးသတ်စခန်းမှ မီးသတ်ယာဉ်(၃)စီးတို့ဖြင့် Level 1 အဆင့် ထွက်ခွာငြှိမ်းသတ်ခဲ့ရာ မနက် ၄ နာရီ မိနစ် ၂၀ ဝန်းကျင်မှာ မီးငြိမ်းခဲ့ပြီး မိနစ် ၄၀ ခန့် ငြိမ်းသတ်ခဲ့ရတယ်လို့ သိရပါတယ်။
မီးသတ်ဦးစီး အရာရှိ ဦးဇော်မျိုးဝင်းက ” အဓိက,ကတော့ ယာဉ်မောင်းတွေပေါ်မူတည်တာပေါ့။ သယ်ဆောင်မောင်းနှင်ရတာလည်း လောင်စာဆီ ဖြစ်နေတော့ ကားစက်ပိုင်းဆိုင်ရာတွေကို ချို့ယွင်းမှုမရှိအောင် အသေးစိတ် စစ်ဆေးဖို့လိုပါတယ်။ နောက်ပြီး အရက်သေစာ သောက်စားတာတွေရောပေါ့။ ယာဉ်တိမ်းမှောက်ရာက မီးလောင်မှုဖြစ်ပွားတဲ့ ဖြစ်စဉ်တွေလည်း ကြုံရပါတယ်။ နောက်တစ်ချက်က ယာဉ်ပေါ်မှာ မီးဘေးကြိုတင်ကာကွယ်ရေးအနေနဲ့ မီးသတ်ဆေးဗူးတွေ ဆောင်ထားတာ၊ သုံးတတ်အောင် လေ့ကျင်သင်ကြားတာ ဒါမျိုးတွေလည်း လိုအပ်တယ်ပါတယ် ခင်ဗျာ့”လို့ ပြောပါတယ်။
အခုဖြစ်စဉ်မှာ ဆီဘောက်ဆာယာဉ်ကို ပေါ့ဆစွာ မောင်းနှင်မှုအတွက် ယာဉ်မောင်းနဲ့ ယာဉ်နောက်လိုက် ဖြစ်သူကို ပုဒ်မ ၂၈၅ နဲ့ အမှုဖွင့်လှစ် စစ်ဆေးအရေးယူနိုင်ရေး ဆောင်ရွက်နေတယ်လို့ သိရပါတယ်။
#centralnewsnaypyitaw
