ဖားကန့်တွင် MPT နှင့် Telenor ဖုန်းလိုင်းများ ပြန်လည်ရရှိပြီဖြစ်သော်လည်း ခေါ်ဆိုမှုများ အခက်အခဲဖြစ်နေဆဲဟု ဆို
ကချင်ပြည်နယ်၊ ဖားကန့်တွင် MPT နှင့် Telenor ဖုန်းလိုင်းများ ပြန်လည်ရရှိပြီဖြစ်သော်လည်း ခေါ်ဆိုမှုများ အခက်အခဲဖြစ်နေဆဲဖြစ်သည်ဟု ဒေသခံသတင်းရင်းမြစ် တစ်ဦးက ပေါ်ပြူလာနယူးစ်ကို ပြောသည်။
ဒေသတွင်း တိုက်ပွဲများကြောင့် ဖုန်းလိုင်းနှင့် အင်တာနက်လိုင်းများ (၄) လကျော်ကြာ ပြတ်တောက်နေခဲ့ရာမှ ယခု နိုဝင်ဘာ (၁၄) ရက်မှ ပြန်လည်ရရှိခဲ့ခြင်းဖြစ်ကြောင်း သိရသည်။
"ဖုန်းလိုင်းတွေက ပြောလို့ရတယ်ဆိုပေမယ့် နေရာတိုင်းတော့မဟုတ်သေးဘူး၊ကွက်ကျားကွက်ကျားပေါ့။ တခါတလေ ခေါ်နေရင်း ပြု-တ်သွားလိုက် စကားပြောနေရင်း ပြု-တ်သွားလိုက်ပေါ့။ ပြောလို့ရတဲ့ အခါရတယ်၊ မရတဲ့အခါမရဘူးဖြစ်နေတာပေါ့"ဟု ၎င်းက ရှင်းပြသည်။
အလားတူ အင်တာနက်များအနေဖြင့် Star Link ဝိုင်ဖိုင်စက်များဖြင့် တစ်နာရီလျှင် ကျပ် (၃၀၀၀)နှုန်း၊ နှစ်နာရီအသုံးပြုလျှင် ကျပ် (၅၀၀၀) ပေးဆောင်၍ အသုံးပြုနေကြရကြောင်း ဆိုသည်။
ဖားကန့်ဒေသအတွင်း လက်ရှိတွင် တိုက်ပွဲများပြန်လည်ငြိမ်သက်နေပြီဖြစ်သည့်အတွက် ကျောက်စိမ်းတူးဖော်ရေး လုပ်ငန်းခွင်များ ပြန်လည်စတင်နေပြီဖြစ်သော်လည်း စက်သုံးဆီပြန်တောက်မှုများကြောင့် လုပ်ငန်းခွင်များတွင်တွင်ကျယ်ကျယ် လုပ်ဆောင်နိုင်ခြင်းမရှိကြောင်း သိရသည်။
