ဟုမ်းလမ်း ဘူတာရပ်ကွက် အုပ်ချုပ်ရေးမှူး သေနတ်ပစ်ခံရသောကြောင့် စိုးရိမ်ရ ဒဏ်ရာ ရရှိ
ဒီဇင်ဘာ ၂၄
ရန်ကုန်တိုင်းဒေသကြီး၊ စမ်းချောင်းမြို့နယ်၊ ဟုမ်းလမ်း ဘူတာရပ်ကွက် အုပ်ချုပ်ရေးမှူး သေနတ်ပစ်ခံရသောကြောင့် စိုးရိမ်ရ ဒဏ်ရာ ရရှိပြီး ဆေးကုသမှု ခံယူနေရကြောင်း လုံခြုံရေးတပ်ဖွဲ့နှင့်နီးစပ်သူတစ်ဦးက ပြောသည်။
ဖြစ်စဉ်မှာ ယနေ့ (ဒီဇင်ဘာလ ၂၄ ရက်) နံနက်ပိုင်း ၁၀ နာရီ ၁၅ မိနစ် အချိန်ခန့်က ဟုမ်းလမ်းဘူတာ ရပ်ကွက်၏ အုပ်ချုပ်ရေးမှူး ဦးစန်းငွေက အုပ်ချုပ်ရေးမှူးရုံးအတွင်း ရုံးလုပ်ငန်းများ ဆောင်ရွက်စဉ် သေနတ်ဖြင့် ပစ်ခတ်သွားခြင်းဖြစ်ကြောင်း သိရသည်။
ထိုသို့ ပစ်ခတ်သည့်အတွက် ဦးစန်းငွေ၏ ဝဲဘက်ဝမ်းဗိုက်တွင် ကျည်ဖောက်ဝင် ဒဏ်ရာရရှိခဲ့ခြင်းဖြစ်ပြီး လက်ရှိတွင် ရန်ကုန်ပြည်သူ့ဆေးရုံကြီးသို့ ဆေးကုသမှုခံယူရန် တင်ပို့ထားကြောင်း သိရသည်။
“လောလောဆယ်တော့ ဆေးရုံရောက်နေပါပြီ။ ဗိုက်ကို တစ်ချက်ထိသွားတယ်။ သုံးယောက်လာတယ် လို့တော့ ပြောတယ်။ ဒဏ်ရာက စိုးရိမ်ရတယ် ဘာလို့လည်း ဆိုတော့ သွေးထွက်လွန်နေတာ” ဟု အထက်ပါ နီးစပ်သူက ဆိုသည်။
လက်ရှိတွင် ကျူးလွန်သူများကို ဖမ်းဆီးရမိရေးအတွက် တာဝန်ရှိသူများက ဆောင်ရွက်နေကြောင်း သိရသည်။
#centralnewsnaypyitaw
