ထိုင်းဗီဇာအတွက် E visa လျှောက်ထားမှုတွင် အထူးသတိထားသင့်သည့် အချက်များကို ထိုင်းသံရုံး သတိပေး
ဇန်နဝါရီ ၁ ရက်မှ စတင်ကာ ထိုင်းဗီဇာ လျှောက်ထားရာတွင် e Visa စနစ်ဖြင့်သာ ပြောင်းလဲလက်ခံနေသည့် မြန်မာနိုင်ငံဆိုင်ရာထိုင်းသံရုံးတွင် E visa လျှောက်ထားရာ၌ အထူးသတိထားသင့်သည့် အချက်များကို ထုတ်ပြန်ထားသည်။
ထုတ်ပြန်ထားရာ၌ အီးဗီဇာစနစ် www.thaievisa.go.th တွင် အီးဗီဇာလျှောက်ထားမည့် မြန်မာနိုင်ငံသားများသည် ဖောင်ဖြည့်ရာတွင်လိုက်နာရမည့်အချက်များကို ဤနေရာတွင် https://www.thaiconsularyangon.....com/evisapay/instru ဖတ်ရှုရမည်ဖြစ်သည်ဟု ဆိုသည်။
မြန်မာနိုင်ငံသားများသည် မျိုးရိုးအမည် “family name” မရှိသောကြောင့် ညွှန်ကြားချက်နံပါတ် (၆) ကိုသေချာစွာလိုက်နာရမည်ဖြစ်သည်ဟုလည်း ဖော်ပြထားသည်။
အဆိုပါညွှန်ကြားချက်တွင် ဖော်ပြထားသည်မှာ မြန်မာနိုင်ငံသားများသည် မိမိအမည်အပြည့်အစုံကို “First name” နေရာတွင်သာဖြည့်ရန်ဖြစ်ပြီး “Family name “နေရာကို အလွတ်ထားရန်ဖြစ်ကာ ညွှန်ကြားချက်ကို မလိုက်နာပါက သင်၏အီးဗီဇာလျှောက်ထားမှု ငြင်းပယ်ခံရမည်ဖြစ်သည်ဟုလည်း သိရသည်။
ထို့အပြင် ၂၀၂၅ ခုနှစ်၊ ဇန်နဝါရီလ ၂-၇ ရက်များအတွက် အီးဗီဇာလျှောက်ထားခဲ့ပြီး အီးဗီဇာကြေးပေးသွင်းရန်နံပါတ်ရရှိပြီးသူများသည် ဖောင်တွင် မိမိအမည်ကို ရှေ့နောက်မှားယွင်းဖြည့်သွင်းမိထားပါက ဖောင်အသစ်ကိုပြန်လည်ဖြည့်သွင်းနိုင်ရန် သံရုံးကခွင့်ပြုပေးမည်ဖြစ်ကာ ထိုသူများသည် လျှောက်လွှာနံပါတ် Request No. အသစ်ကို မူလကရရှိထားသော အီးဗီဇာကြေးပေးသွင်းရန်နံပါတ် E-visa payment reservation No.နှင့်အတူ တွဲဖက်အသုံးပြုရမည် ဖြစ်ကြောင်းလည်း ထုတ်ပြန်ထားသည်။
