လွတ်ငြိမ်းချမ်းသာခွင့်ဖြင့် ပြန်လည်လွတ်မြောက်ခဲ့သော ထိုင်းနိုင်ငံသား ၁၅၀ ကျော်ကို မိခင်နိုင်ငံသို့ ပြန်ပို့
ဇန်နဝါရီ ၆
နစကအစိုးရသည် ဇန်နဝါရီ ၄ ရက်နေ့က အကျဉ်းကျနေသူများကို လွတ်ငြိမ်းချမ်းသာခွင့်ပေးခဲ့ရာ ထိုင်းနိုင်ငံသား ၁၅၁ ဦး ပြန်လည်လွတ်မြာက်လာခဲ့ကြောင်း ထိုင်းအာဏာပိုင်များက ပြောသည်။
အဆိုပါ ထိုင်းနိုင်ငံသား ၁၅၁ ဦးသည် အွန်လိုင်းလောင်းကစားမှုများဖြင့် ဖမ်းဆီးထိန်းသိမ်းခံရပြီး မြန်မာနိုင်ငံရှိအကျဉ်းထောင်များတွင် ထိန်းသိမ်းခံထားရသူများဖြစ်ကြောင်း သိရသည်။
လွတ်ငြိမ်းချမ်းသာခွင့်ကြောင့် ပြန်လည်လွတ်မြောက်ခဲ့သော ထိုင်းနိုင်ငံသား ၁၅၁ ဦးထဲတွင် အမျိုးသား ၇၄ ဦးနှင့် အမျိုးသမီး ၇၇ ဦးတို့ ပါဝင်ခဲ့ပြီး ၎င်းတို့သည် ချင်းရိုင်ပြည်နယ် မယ်ဆိုင်စစ်ဆေးရေးဂိတ်နှင့် အမှတ် (၂) ထိုင်း-မြန်မာချစ်ကြည်ရေးတံတားကို ဖြတ်သန်းကာ မိခင်နိုင်ငံသို့ ပြန်ပို့ခဲ့ခြင်းဖြစ်ကြောင်း သိရသည်။
ပြန်လည်လွတ်မြောက်လာသော ထိုင်းနိုင်ငံသားများကို ထိုင်းရဲတပ်ဖွဲ့အကြီးအကဲ ရဲချုပ် တက်ချိုင်း ပီတာနီ လာဘော့ ဦးဆောင်သော ထိုင်းအစိုးရတာဝန်ရှိသူများက လက်ခံကြိုဆိုခဲ့ကြောင်း သိရသည်။
မြန်မာအာဏာပိုင်များသည် ပြီးခဲ့သော ၂၀၂၄ခုနှစ်အတွင်း အွန်လိုင်းမှတစ်ဆင့် လိမ်လည်နေသည့်ဂိုဏ်းများ၊ အွန်လိုင်းလောင်းကစားဂိုဏ်းများကို ဖြိုခွင်းခဲ့ရာ ထိုင်းနိုင်ငံသား ၁၅၄ ဦး ဖမ်းဆီးခံခဲ့ရကြောင်း သိရသည်။
မြန်မာတရားရုံးသည်ဖမ်းဆီးခံရသည့် ထိုင်းနိုင်ငံသားများကို မြန်မာနိုင်ငံအတွင်းသို့ တရားမဝင် ဝင်ရောက်နေထိုင်မှု၊ တရားမဝင် လောင်းကစားလုပ်ငန်းများတွင် ပါဝင်လုပ်ကိုင်မှုများကြောင့် ထောင်ဒဏ် ၁နှစ်စီ ပြစ်ဒဏ်ချခဲ့ကြောင်း သိရသည်။ သို့သော်လည်း ပြစ်ဒဏ်ချခံရသော ထိုင်းနိုင်ငံသားများအနက်မှ အရွယ်မရောက်သေးသူ ၂ ဦးကို မိခင်နိုင်ငံသို့ စောစီးစွာ ပြန်ပို့ခဲ့သလို အခြားထိုင်းနိုင်ငံသားတစ်ဦးက ပြစ်ဒဏ်ခံယူနေချိန်အတွင်းသေဆုံးခဲ့ကြောင်း သိရသည်။
ထိုင်းအာဏာပိုင်များသည် ထိုင်းနိုင်ငံသား ၁၅၁ ဦးကို ပြန်လည်လွှဲပြောင်းရယူချိန်အတွင်း ကျန်းမာရေးစစ်ဆေးမှုအပါအဝင် လုပ်ထုံးလုပ်နည်းများအတိုင်း စစ်ဆေးကာ ပြန်လည်လက်ခံခဲ့ကြောင်း ထိုင်းအခြေစိုက်သတင်းများတွင် ဖော်ပြထား သည်။ ထိုင်းရဲတပ်ဖွဲ့အနေဖြင့် အဆိုပါထိုင်းနိုင်ငံသား ၁၅၁ ဦးကို အသေးစိတ်စုံစမ်းစစ်ဆေးမေးမြန်းမှုများ ထပ်မံလုပ်ကိုင်မည်ဖြစ်သလို လူကုန်ကူးမှု၊ အွန်လိုင်းမှတစ်ဆင့်လိမ်လည်နေသော ဂိုဏ်းများနှင့် ဆက်နွှယ်မှုရှိမရှိဆိုသောအချက်ကို ထပ်မံ စစ်ဆေးသွားမည်ဖြစ်ကြောင်း သိရသည်။
REf Thailandnews
#centralnewsnaypyitaw
