#ယနေ့ထုတ်သတင်းစာ_သတင်း
◼ ရန်ကုန်ရှိ ထိုင်းသံရုံးဝင်းအတွင်း ကျင်းပရန် စီစဉ်ထားသော သင်္ကြန်ပွဲတော်အစီအစဉ်အား ဖျက်သိမ်း
မြန်မာနိုင်ငံအတွင်း လှုပ်ခတ်ခဲ့သောအင်အားပြင်း ငလျင်ကြောင့် သင်္ကြန်ပွဲတော် အစီအစဉ်အားဖျက်သိမ်းလိုက်ကြောင်း မတ် ၃၁ ရက်က မြန်မာနိုင်ငံဆိုင်ရာ ထိုင်းသံရုံးကထုတ်ပြန်သည်။
မြန်မာနိုင်ငံဆိုင်ရာထိုင်းသံရုံး၏ သင်္ကြန်ပွဲတော်အစီအစဉ်ကို ဧပြီ ၁ ရက်တွင် ရန်ကုန်မြို့ရှိ ထိုင်းသံရုံးဝင်းအတွင်း ကျင်းပရန်စီစဉ် ထားခြင်းဖြစ်ပြီး မတ် ၂၈ ရက် မြန်မာစံတော်ချိန် မွန်းလွဲ ၁၂ နာရီ ၅၁ မိနစ် ဝ၂ စက္ကန့်ကမြန်မာနိုင်ငံတွင် လှုပ်ခတ်ခဲ့သည့် ပြင်းအား ၇ ဒသမ ၇ ရစ်ချ်တာစကေးရှိ အလွန်ပြင်းထန်သည့် မြေငလျင်လှုပ်ခတ်ခဲ့မှုကြောင့် အသက်ဆုံးရှုံးမှုများနှင့် ပျက်စီးဆုံးရှုံးခဲ့ရမှုများကြောင့် ထိုသို့ရုပ်သိမ်းလိုက်ခြင်းဖြစ်ကြောင်း သိရသည်။
လက်ရှိတွင်မြန်မာပြည်သူများအတွက် ကယ်ဆယ်ရေးလုပ်ငန်းများနှင့် သဘာဝဘေးအန္တရာယ်ဆိုင်ရာ ကယ်ဆယ်ရေးလုပ်ငန်းများကို ပံ့ပိုးကူညီရန် သံရုံးတာဝန်ရှိသူများကတက်ကြွစွာ ပူးပေါင်းဆောင်ရွက်လျက်ရှိကြောင်း ထုတ်ပြန်ချက်၌ဖော်ပြထားသည်။
ထို့ပြင်မြန်မာနိုင်ငံရှိ ငလျင်ဒဏ်ခံခဲ့ရသူများအား ရှာဖွေကယ်ဆယ်ရေး လုပ်ဆောင်ရန်ထိုင်းတော်ဝင် ကြည်းတပ်၏ အထူးတပ်ဖွဲ့ဝင် ၅၅ ဦးကို မတ် ၃၀ ရက် နံနက်ပိုင်းက မြန်မာနိုင်ငံသို့ အထူးလေယာဉ်ဖြင့် စေလွှတ်ထားပြီးဖြစ်ကြောင်းသိရသည်။
