Samingdam က မိုးထက်အောင်ကို အမှတ်ပြတ်နိုင်ပါတယ်။ အမှတ်ပေးဒိုင်လူကြီး (၃) ဦးလုံးက အနိုင်ပေးခဲ့တာပါ။ မိုးထက်အောင်ရဲ့ မာဂုဏ်ကြီးက အကြမ်းစားကြီးပါ။ ဒါပေမယ့် ပတ်တံတောင်ရိုက်ပြီး ပွဲသိမ်းချင်တာလား မသိဘူး။ ပတ်တံတောင်ရိုက်ချက်တွေ မလိုအပ်ဘဲ သုံးနေတယ်။ Samingdam က အကွက်ပိုစုံပါတယ်။
Samingdam က မိုးထက်အောင်ထက် ပွဲတွင်းဝိတ်များပါတယ်။ ပထမအချီမှာတည်းက ဆိုင်ထိုးနေကြတာ ကြောက်စရာကြီးပါ။ ဒုတိယအချီမှာ Samingdam က တော်တော်သာတယ်။ မိုးထက်အောင်က ပတ်တံတောင်ရိုက်ချင်ပေမယ့် တိုင်မင်လွဲနေတယ်။ Samingdam ကပဲ ထိချက်အသာစီးယူနိုင်တယ်။ မာဂုဏ်ကြောင့်သာ မိုးထက်အောင်က အလဲထိုးမခံရတာပါ။
Samingdam ရဲ့ Head Movement ကိုပဲ ချီးကျူးချင်ပါတယ်။ မိုးထက်အောင်ရဲ့ အပိုင်လက်သီးတွေကို အေးဆေးရှောင်ပြတာပါ။ လက်သီးထိုးတာ အားလွန်နေတာမို့ အသာရှောင်နိုင်တာလည်း ပါတယ်။ ပြီးတော့ ဝိုက်လက်သီးနောက်မှာ ကပ်လာပါလာတဲ့ ပတ်တံတောင်ကိုလည်း အသာလေးရှောင်ပြသွားတယ်။ မိုးထက်အောင်ကလည်း ဝိုက်လက်သီးနဲ့ ပတ်တံတောင်ကို တွဲစပ်အသုံးပြုလွန်းတာမို့ မှတ်မိနေတယ်ထင်ပါတယ်။
တတိယအချီမှာလည်း Samingdam က ပိုကောင်းတယ်။ မိုးထက်အောင်က အတင်းပွဲဖြတ်ဖို့ ကြိုးစားပေမယ့် အရာမထင်ဘူး။ Samingdam က ချိန်ထိုးတဲ့ မိုးထက်အောင်ရဲ့ လက်သီးလမ်းကြောင်းကို တွက်ဆမိနေတာပါ။ လက်သီးလွဲရင် Spinning Back Fist လာတယ်။ အလွတ်ရနေတဲ့ Combo ကြီးပါ။ အမှတ်ပေးဒိုင်လူကြီးတွေရဲ့ ဆုံးဖြတ်ချက်က မှန်ကန်တယ်လို့ ဆိုချင်ပါတယ်။
