ရေနန်တော်ကို စနစ်တကျ ဖော်ထုတ်ကာ အများပြည်သူများလေ့လာနိုင်ရန် စီမံဆောင်ရွက်သွားမည်
*****************
(ပြည်တွင်း) ဧပြီ ၉
ပြီးခဲ့တဲ့ မတ်လ ၂၈ ရက်က လှုပ်ခတ်ခဲ့တဲ့ အင်အားပြင်း မန္တလေးငလျင်ကြီးကြောင့် ထွက်ပေါ်လာတဲ့ ရတနာပူရအင်းဝမြို့ဟောင်းရှိ သရက်ကင်းလှေကားနှင့် ရေနန်းတော်ကို စနစ်တကျ ဖော်ထုတ်ထိန်းသိမ်းသွားပြီး အများပြည်သူ လေ့လာနိုင်ရန်အတွက် စီမံဆောင်ရွက်သွားမည်ဖြစ်ကြောင်း သာသနာရေးနှင့်ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့် အမျိုးသားပြတိုက် ဦးစီးဌာနကနေ သိရပါတယ်။အဆိုပါရေနန်းတော်ကို ရှေးဟောင်းသုတေသနနှင့်အမျိုးသားပြတိုက်ဦးစီးဌာန၊ မန္တလေးဌာနခွဲက ဧပြီလ ၆ ရက်မှစတင်ပြီး စမ်းသပ်တူးဖော်လျက်ရှိတယ်လို့သိရပါတယ်။
သို့ဖြစ်၍ သာသနာရေးနှင့်ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့်အမျိုးသားပြတိုက်ဦးစီးဌာနအနေနဲ့ မြန်မာ့ရှေးဟောင်းယဉ်ကျေးမှုအမွေအနှစ်များကို အစဉ်တစိုက်တူးဖော် ထိန်းသိမ်းခြင်းလုပ်ငန်းများ ဆောင်ရွက်လျက်ရှိရာ ယခုငလျင်ကြီးကြောင့် ထွက်ပေါ်လာသည့် အင်းဝခေတ်ယဉ်ကျေးမှုအဆောက်အအုံမွေအနှစ်ကို စနစ်တကျဖော်ထုတ်ထိန်းသိမ်းသွားပြီး အများပြည်သူများ လေ့လာနိုင်ရန်အတွက် စီမံဆောင်ရွက်သွားမည်ဖြစ်ကြောင်း သိရပါတယ်။
မန္တလေးတိုင်းဒေသကြီး၊ တံတားဦးမြို့နယ်၊ ရတနာပူရ အင်းဝမြို့ဟောင်း စည်သူပုံမြို့ရိုးရဲ့ အပြင်ဘက် အရှေ့ မြောက်ထောင့်မှာ ကုန်းဘောင်ခေတ်ဦး ဆင်ဖြူရှင်မင်းနှင့် စစ်ကိုင်းမင်းတို့ လက်ထက်တည်ဆောက်ခဲ့တဲ့ ရေနန်းတော် ဖြစ်တယ်လို့ သိရပါတယ်။
သမိုင်းမှတ်တမ်းများအရ ရေနန်းတော်ဟာ ဆင်ကပ်လှေကားအိမ်ပါသော သရက်ကင်း အုတ်လှေကားကြီးများ၊ အဆောင်များကို ကျွန်းသစ်နဲ့ တည်ဆောက်ခဲ့ပြီး သရက်ကင်း အုတ်လှေကားကြီး ၅ စင်း၊ ပြဿဒ်နှင့် ဇေတဝန်ဆောင်အပါအဝင် စုစုပေါင်းအဆောင် ၁၈ ဆောင်ပါဝင်တယ်လို့သိရပါတယ်။
သမိုင်းမှတ်တမ်း ပုရပိုက်များအရ ရေအိမ်တော်များပါရှိတဲ့အတွက် အဆောင် ၂၀ ရှိမယ်လို့ ခန့်မှန်းထားပြီး အဆိုပါအဆောင်များကို မြန်မာ့ဗိသုကာနည်းပညာအတိုင်း မြေဝင်တစ်သူ၊ ကျောရပ်တစ်လံ၊ အမြင့်မှာကြမ်းခင်းလျက်အပေါ်ပိုင်းတွင် သက်ဆိုင်ရာ မင်းခမ်းမင်းနားအဆောင်များ ပါဝင်မယ်လို့ ယူဆထားပါတယ်။
