မြဝတီမြို့နယ်အတွင်းရှိ ကျားဖြန့်လုပ်ကိုင်သူ နိုင်ငံခြားသား ၇၀၀၀ ကျော် နေရပ်ပြန်ပို့ခဲ့ပြီးဖြစ်သော်လည်း ကျားဖြန့်လုပ်ငန်းများ ဆက်လက် လည်ပတ် လုပ်ကိုင်နေဆဲ၊ လောင်စာဆီများလည်း နည်းလမ်းမျိုးစုံဖြင့် ဝင်နေဆဲ
ရန်ကုန်၊ ဧပြီ ၉
ထိုင်း-မြန်မာ နယ်စပ် မြဝတီမြို့နယ်အတွင်း တရုတ်နှင့် ထိုင်းနိုင်ငံတို့၏ ဖိအားပေးမှုဖြင့် စစ်ကောင်စီ လက် အောက် ခံ BGF က ငွေလိမ်ဂိုဏ်း နှိမ်နင်းရေး လုပ်ငန်းများ လုပ်ကိုင်နေသော်လည်း လက်ရှိ မြဝတီမြို့နယ် အတွင်း ငွေလိမ်ဂိုဏ်းလုပ်ငန်း နေရာများတွင် ကျားဖြန့်လုပ်ငန်းများ ဆက်လက်လုပ်ကိုင်မှုများ ရှိနေဆဲဖြစ် ကြောင်း ဆက်စပ်လုပ်ကိုင်သူများထံမှ ရန်ကုန်ခေတ်သစ် သတင်းဌာနထံသို့ ပြောဆိုသည်။
တချို့ ငွေလိမ်ဂိုဏ်းများသည် လုပ်ငန်းနေရာတချို့ ပြောင်းလဲလုပ်ကိုင်နေပြီး တချို့ငွေလိမ်လုပ်ငန်းများသည် နေ ရာ ပြောင်းခြင်းမရှိဘဲ မူလနေရာမှာပင် အလုပ်သမားအသစ်များ ခေါ်ယူကာ ဆက်လက် လုပ်ကိုင်နေမှုများရှိနေကြောင်း ငွေလိမ်ဂိုဏ်းလုပ်ငန်းများနှင့် ဆက်စပ် လုပ်ကိုင်နေသူများက ပြောသည်။
"တရုတ်တွေ ဆက်ရှိနေတုန်းပဲ။ ကျားဖျန့်လည်းဆက်လုပ်နေတာပဲ။ မြဝတီမှာ ပုံမှန်ပဲ သွားလာ နေကြတယ်။ ကျား ဖြန့်ရုံတွေလည်း ဆက်လုပ်နေတာပဲ။ အလုပ်ပိတ် သွားတာမျိုး မရှိသေးဘူး။ BGF နဲ့ဆက်သွယ်ပြီး နေရပ်ပြန်တဲ့တရုတ်တွေ နိုင်ငံခြားသား ကပ္ပလီတွေ၊ ပါကစ္စတန်တွေက တစ်ပိုင်း၊ ကျားဖြန့် ဆက်လုပ်နေကြတဲ့ တရုတ်တွေ နိုင်ငံခြားသားတွေက တစ်ပိုင်း အဲလိုဖြစ်နေတာတွေ့ရတယ်" ဟု ကျားဖြန့် လုပ်ငန်းနှင့်ဆက်စပ်နေသူတစ်ဦးက ဆိုသည်။
လက်ရှိ မြဝတီမြို့နယ်ထဲတွင် ရွှေကုက္ကိုလ်၊ ကျောက်ခက်၊ မယ်ထော်သလေး AA Park၊ KK Park နေရာ များတွင် တရုတ် ငွေလိမ်ဂိုဏ်း (ကျားဖြန့်) လုပ်ငန်းများ အများဆုံးရှိနေပြီး ယင်းနေရာများမှ တရုတ်၊ အန္ဒိယ၊ မလေးရှား၊ အင်ဒိုနီးရှား ၊ ဗီယက်နမ် ၊ လာအို၊ ကမ္ဘောဒီးယား၊ ပါကစ္စတန်၊ အီသီယိုးပီးယား အပါအဝင် နိုင်ငံပေါင်း ၃၀ ကျော်မှ ငွေလိမ် အလုပ်သမားအဖြစ် လူမှောင်ခိုကူး ရောင်းစား ခံထားရသူနှင့် ငွေလိမ်လုပ်ငန်းတွင် အလုပ်လုပ် နေသူ နိုင်ငံခြားသားများကို ရှာဖွေ ဖမ်းဆီး နှိမ်နှင်းခြင်းများ လုပ်ဆောင် နေ သည်ဟု BGF တပ်ဖွဲ့ က သတင်းမီဒီယာများသို့ ထုတ်ဖော်ပြောဆိုထားသည်။
မြဝတီမြို့ရှိ တရုတ် ငွေလိမ်ဂိုဏ်း (ကျားဖြန့်) နေရာများမှ လူမှောင်ခို ကူးခံရသူနှင့် ငွေလိမ် လုပ်သားများကို ကရင်နယ်ခြား စောင့်တပ် BGF က ရှာဖွေဖမ်းဆီးပြီး မူလ နိုင်ငံများ ထံ ထိုင်းအာဏာပိုင်များမှ တစ်ဆင့် ပြန်လွှဲပို့ရာ ယခု ဧပြီလ ၈ရက်အထိ လူပေါင်း ၇၁၀၄ ဦးကို ပြန်လည်ပေးပို့ပြီး ဖြစ်ကြောင်း မြဝတီ BGF တပ်ဖွဲ့က ပြောဆိုထားသည်။
ထိုင်းအစိုးရက ကျားဖြန့် လုပ်ငန်းများ နှိမ်နင်းရေးအတွက် မြန်မာဘက်သို့ လျှပ်စစ်မီးဖြတ်တောက်ခြင်း၊ လောင် စာဆီဖြတ်တောက်ခြင်း၊ အင်တာနက်ဖြတ်တောက်ခြင်းများ လုပ်ဆောင်လျက်ရှိသော်လည်း စက်သုံးဆီ ပီပါများမှာ အလုံးအရင်းဖြင့် နည်းလမ်းမျိုးစုံသုံး၍ မြ၀တီမြို့နယ်အတွင်းသို့ ဝင်ရောက်နေကြောင်း၊ ယင်းစက်သုံးဆီများဖြင့် မြ၀တီမြို့နယ်အတွင်းရှိ ကျားဖြန့် လုပ်ငန်းများ ဆက်လက် လည်ပတ်လုပ်ကိုင်နေကြောင်း သိရှိရသည်။
"ထိုင်းဘက်က ပိတ်တယ်ပြောပေမယ့်လည်း နည်းပေါင်းစုံနဲ့ စက်သုံးဆီပီပါလိုက် ဝင်နေတာပါပဲ။ အရင်ထက်စျေးကြီး သွားတာကလွဲရင် ပြတ်လပ်မှုကတော့ မဖြစ်ဘူး။ ပိတ်တယ်ဆိုပေမယ့် ကမ်းကူးပြီးရောက်လာတာပါပဲ" ဟု မြ၀တီအခြေစိုက် နယ်စပ်ကုန်သည်တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဓာတ်ပုံ- စစ်ကောင်စီလက်အောက်ခံ BGF က ပြန်လည်ပို့ဆောင်နေသော ကျားဖြန့်လုပ်ငန်းများမှ နိုင်ငံခြားသားများ။
