▪️လူ့ကျင့်ဝတ်ဆိုတဲ့ Ethic ဆိုတာက စီးပွားရေးလောကမှာသာ အရေးကြီးတာ မဟုတ်ပါဘူး။ နေရာတိုင်းမှာ ရှိရမယ့်အရာ ဖြစ်ပါတယ်။ ဘယ်လိုလုပ်ငန်းစဥ်မျိုးမှာမဆို Ethic ကို ချန်ထားခဲ့လို့ မရပါဘူး။ နေရာတိုင်း လူတိုင်းအပေါ်မှာ ထားရှိရမယ့် စည်းကမ်းလို့ ဆိုနိုင်သလို ကိုယ်ချင်းစာတရားနဲ့ သက်ဆိုင်နေမယ် ထင်ပါတယ်။
Ethic ရှိဖို့အတွက် လိုအပ်တဲ့အချက်က "သူ့နေရာမှာ ငါသာဆိုရင်" ဆိုတဲ့ အတွေးမျိုးလေး တွေးပေးတတ်ဖို့ပါပဲ။
▪️ဥပမာဆိုကြပါစို့ .. ကိုယ်က ပင်ပင်ပန်းပန်း ဖန်တီးထားတဲ့အရာတစ်ခုကို သူများက အလွယ်တကူ လိုက်လုပ်ပြီး အသုံးချသွားရင် ကိုယ်ဘယ်လို ခံစားရမလဲ.. ။ ကိုယ်အရမ်းချစ်ရတဲ့သူတစ်ယောက်ကို သူများက စနိုက်ကျော်သွားရင် ကိုယ်ဘယ်လို ခံစားရမလဲ.. ။ ကိုယ်မခံစားနိုင်ဘူးဆိုရင် သူများအပေါ်ကိုလည်း အဲလိုမလုပ်မိစေနဲ့ပေါ့။
လူ့ကျင့်ဝတ်ဟာ ရိုးရိုးရှင်းရှင်းကလေးပါ။ ကိုယ်မကြိုက်တဲ့အရာကို သူများအပေါ် မလုပ်မိဖို့ပါပဲ။ ဒါတွေက မပြောလည်းပဲ နားလည်ထားရမယ့်အရာ ဖြစ်ပါတယ်။ အချင်းချင်းစာနာနားလည်မှု၊ အပြန်အလှန်လေးစားမှုဆိုတာတွေနဲ့ တည်ဆောက်ထားရတာဖြစ်လို့ လူ့ဂုဏ်သိက္ခာအတွက် အခြေခံအကျဆုံးပါပဲ။
▪️ဘယ်သူမှ ပြောမပြလည်း နားလည်ထားသင့်တဲ့ ကျင့်ဝတ်တွေက အများကြီးပါပဲ.. ။ ပစ္စည်းရောင်းတဲ့ဆိုင်တွေကို ဘယ်ကနေ ပစ္စည်းလက္ကားယူရောင်းတာလဲ လို့ မမေးတာကလည်း ကျင့်ဝတ်.. ။ ဘယ်လောက် ရင်းနှီးပါစေ.. သူများပြောမပြချင်တဲ့ ကိုယ်ရေးကိုယ်တာအတွင်းရေးတွေကို အတင်းမမေးတာလည်း ကျင့်ဝတ်.. ။ သူများရဲ့ဖန်တီးမှုတွေကို ပုံစံတူ ကူးချတာတွေ မလုပ်တာကလည်း ကျင့်ဝတ်.. စသဖြင့်ပေါ့။
ကျင့်ဝတ်ကို နားလည်ဖို့က ဆင်းရဲတာ.. ချမ်းသာတာ၊ အတန်းပညာတတ်တာ.. မတတ်တာတွေနဲ့ မဆိုင်ပါဘူး။ လုပ်သင့်တယ် မလုပ်သင့်ဘူး ဆင်ခြင်တုံတရား ရှိတာ.. မရှိတာ၊ ကိုယ်ချင်းစာတရား ရှိတာ မရှိတာတွေနဲ့သာ ဆိုင်ပါတယ် ။
▪️ကိုယ့်ရဲ့လုပ်ရပ်တိုင်းဟာ ကိုယ့်ရဲ့ဂုဏ်သိက္ခာဖြစ်ပါတယ်။ ကိုယ့်ရဲ့Ethic ဟာ ကိုယ့်ဂုဏ်သိက္ခာကို ဖော်ပြနေတာဖြစ်လို့ ဘဝနဲ့ပါ သက်ဆိုင်နေပါတယ်။ Ethic ရှိရှိ နေထိုင်တာက အမှားကို ရှောင်ရုံတင် မဟုတ်ပါဘူး။ ဂုဏ်သိက္ခာကိုပါ တည်ဆောက်လိုက်တာပါ။ နေရာတိုင်းမှာ Ethic ရှိလာတဲ့အခါ ဘယ်လိုအကျိုးကျေးဇူးတွေ ရနိုင်လဲ ဆိုရင်..
" ကိုယ့်ကိုယ်ကိုယ် လေးစားမှု "
ကျင့်ဝတ်သိက္ခာရှိရှိ နေထိုင်တာက ကိုယ့်ကိုယ်ကိုယ် လေးစားမှု ရှိလာစေပါတယ်။ Ethic ရှိလာတာနဲ့အမျှ ကိုယ့်ကိုယ်ကိုယ် ယုံကြည်မှုရှိလာပါတယ်။ လိပ်ပြာလုံနိုင်လာတယ်။ ကိုယ်ပိုင်တန်ဖိုးတွေကို ပိုပြီး ဂုဏ်ယူတတ်လာပါလိမ့်မယ်။
" အခြားသူတွေဆီက လေးစားမှု "
ဘယ်သူမဆို ကျင့်ဝတ်ရှိတဲ့သူနဲ့ပဲ အလုပ်တွဲလုပ်ချင်ကြပါတယ် ။ အပေါင်းအသင်းလုပ်ချင်ကြပါတယ်။ အလုပ်မှာလည်း အလုပ်နဲ့ဆိုင်တဲ့ ကျင့်ဝတ်ရှိမှ အဆင်ပြေနိုင်သလို ပေါင်းသင်းဆက်ဆံရေးမှာလည် မိတ်ဆွေပီသတဲ့ကျင့်ဝတ်ရှိမှ ဆက်ဆံရေးဟာ ခိုင်မြဲနိုင်မှာပါ။ ဥပမာ - ကိုယ့်မိတ်ဆွေက ကိုယ့်ကို ယုံကြည်လို့ ပြောတဲ့ စကားတွေကို သူများကို ပြန်ဖောက်သည်မချတာမျိုးပေါ့။ ဒါကလည်း မိတ်ဆွေကျင့်ဝတ်တွေထဲက တစ်မျိုးပါပဲ။
" ပိုမိုကောင်းမွန်တဲ့ ဂုဏ်သတင်း "
ဂုဏ်သတင်းတစ်ခုက စစ်မှန်တဲ့ Original တွေဆီကပဲ ထွက်ပေါ်လာနိုင်တာပါ။ အတုအပမှာ ဂုဏ်သတင်းဆိုတာ ရှိလာနိုင်ဖို့ ခက်ပါတယ်။ အောင်မြင်နေတဲ့အရာတစ်ခုကို အတုအပလုပ်လို့ ဂုဏ်တက်မလာပါဘူး။ လိုက်တုပသူကသာ ဂုဏ်သိက္ခာကျဆင်းသွားရမှာပါ။
ဟိုနေ့က ကုန်စုံဆိုင်တစ်ခုမှာ မုန့်ဝယ်သွားတော့ နာမည်ရှိတဲ့ မုန့်တံဆိပ်တစ်ခုကို တုပပြီး နာမည်ကအစ ဒီဇိုင်းကာလာအနေအထား ထပ်တူနီးပါးတူအောင် လုပ်ထားတဲ့ထုတ်ကုန်အသစ်တစ်ခုကို တွေ့ခဲ့ရပါတယ်။ အဲဒီလို လုပ်ထားတဲ့အရာတစ်ခုကို ဝယ်ယူဖို့ ယောင်လို့တောင် စိတ်မကူးမိပါဘူး။
▪️အောင်မြင်နေတဲ့အရာတစ်ခုကို ဆင်တူယိုးမှားလုပ်ရင် အဲဒီနည်းတူ အောင်မြင်မှုကို လွယ်လွယ်နဲ့ရလာမယ် ထင်တတ်ကြပါတယ်။ ဒါပေမယ့် တကယ်တမ်း အဲဒီလိုလိုက်လုပ်တဲ့အခါ Impression Down သွားပြီး ရှိနေတဲ့ပုံရိပ်ပဲ ထိုးဆင်းကျသွားရမှာပါ။
နာမည်ကောင်းတစ်ခုက ဘယ်နယ်ပယ်ပဲရောက်ရောက် အလိုအပ်ဆုံးအရာပါ။ ကျင့်ဝတ်သိက္ခာရှိရှိနေထိုင်သူကသာ နာမည်ကောင်းတစ်ခုကို ရေရှည်တည်ဆောက်လို့ ရနိုင်တာဖြစ်ပါတယ်။ စစ်မှန်မှု မရှိရင် ဘယ်နေရာမှာမှ ကြာရှည်ရပ်တည်လို့ မရပါဘူး။
📌 ဒါ့ကြောင့် လူ့အဖွဲ့အစည်းအပေါ် အပြုသဘောဆောင်တဲ့ အကျိုးသက်ရောက်မှုတွေ ဖြစ်စေဖို့ Ethic မရှိတဲ့အရာတွေကို ရှုတ်ချတတ်ဖို့နဲ့ Ethic မရှိသူတွေကို ထောက်ခံအားပေးတာတွေ မလုပ်မိဖို့က အရေးကြီးဆုံးပါ။ အဲဒီအတွက် တစ်ခုလေးပဲ လိုတာပါ..။ " သူ့နေရာမှာ ငါသာဆိုရင်.. ဘယ်လို ခံစားရမလဲ" ဆိုတဲ့ အတွေးကလေး တွေးပေးတတ်ဖို့ပါပဲ ။
#ဉာဏ
#ငြိမ်းချမ်းသောစိတ်ငြိမ်းချမ်းသောဘဝ
January 11, 2023
