မန္တလေး - လားရှိုး ယာဉ်စီးခ အရင်က နှစ်သောင်း၊ အခု ၇ သိန်း မှ ၁၂ သိန်းထိ ပေါက်စျေးရှိ
မန္တလေးမြို့မှ ရှမ်းပြည်နယ် မြောက်ပိုင်း၊ လားရှိုးမြို့ကို ပြေးဆွဲနေသည့် ခရီးသည်တင်ယာဉ်များ၏ ယာဉ်စီးခများမှာ တဦးလျှင် ကျပ် ၇ သိန်းမှ ၁၂ သိန်းရှိနေကြောင်း ဒေသခံများထံမှ သိရသည်။
လက်ရှိ နယ်မြေအခြေအနေကြောင့် မန္တလေး - လားရှိုး ပြည်ထောင်စုလမ်းကို အသုံးပြုနိုင်ခြင်း မရှိဘဲ အခြားလမ်းပိုင်းများကိုသာ အသုံးပြုရသည့်အတွက် ခရီးလမ်းပိုင်းရှည်ပြီး အချိန်ကြာမြင့်မှုများကြောင့် ယာဉ်စီးခများ စျေးနှုန်းမြင့်မားနေခြင်းဖြစ်သည်။ လမ်းမှာ ဘာအခက်အခဲမှမရှိလျှင် အနည်းဆုံး ၂ ညအိပ်ရပြီး မဟုတ်ရင် ၄ ရက်လောက်ကြာသည်။
မိုင်ပေါင်း ၁၇၀ ကျော်သာ ကွာဝေးသည့် မန္တလေးနှင့် လားရှိုးမှာ ယခင်က ပြည်ထောင်စုလမ်းကို အသုံးပြု၍ ခရီးသည်တင် Express များပြေးဆွဲလေ့ရှိပြီး ယာဉ်စီးခမှာလည်း တဦးလျှင် ၂၀၀၀၀ ကျပ်ဝန်းကျင်သာရှိသည်။ လက်ရှိအချိန်တွင် Express များပြေးဆွဲမှု ရပ်ဆိုင်းနေပြီး အိမ်စီးကားငယ်လေးများသာ ပြေးဆွဲပေးနေကြောင်း သိရသည်။
