#ယနေ့ထုတ်သတင်းစာ_နိုင်ငံတကာသတင်း
◼ ဟူသီအုပ်စု၏ ပင်လယ်နီရေကြောင်းလမ်း တိုက်ခိုက်မှုများကြောင့် စူးအက်တူးမြောင်း၏ လစဉ်ဝင်ငွေဆုံးရှုံးမှု ဒေါ်လာသန်း ၈ဝဝ ခန့်ရှိ
ဒေသတွင်းအခြေအနေများကြောင့် စူးအက်တူးမြောင်း၏ လစဉ် ဝင်ငွေဆုံးရှုံးမှုမှာ အမေရိကန်ဒေါ်လာ သန်း ၈ဝဝ ဝန်းကျင်အထိ ရှိလာခဲ့ပြီဖြစ်ကြောင်း အီဂျစ်သမ္မတအယ်လ်စီစီက မတ် ၁၇ ရက်တွင် ထုတ်ဖော်ပြောကြားလိုက်သည်။
ယီမင်အခြေစိုက် ဟူသီသူပုန်အုပ်စုက ပင်လယ်နီရေပြင်အတွင်း သွားလာနေကြသည့် ကုန်တင်သင်္ဘောများနှင့် စစ်သင်္ဘောများကို တိုက်ခိုက်နေချိန်တွင် စူးအက်တူးမြောင်း၏ လစဉ်ဝင်ငွေဆုံးရှုံးမှု မြင့် တက်လာခဲ့ရခြင်းဖြစ်သည်။
ဂါဇာစစ်ပွဲကာလအတွင်း ပါလက်စတိုင်းများကိုထောက်ခံကြောင်း ပြသသည့်အနေဖြင့် အီရန်ကျောထောက်နောက်ခံပြု ဟူသီသူပုန်အုပ်စုသည် ၂ဝ၂၃ ခုနှစ် နိုဝင်ဘာလအတွင်းမှစ၍ ပင်လယ်နီရေပြင်အတွင်း သွားလာနေသောသင်္ဘောများကို စတင်တိုက်ခိုက်ခဲ့သည်။
ဟူသီအုပ်စု၏ အထက်ပါတိုက်ခိုက်မှုများကြောင့် နိုင်ငံတကာကုန်တင်သင်္ဘောများအနေဖြင့် စူးအက်တူးမြောင်းကိုရှောင်၍ အာဖရိကတိုက်ကို ကွေ့ပတ်မောင်းနှင်နေရသည်ဖြစ်ရာ ရေကြောင်းကုန်သွယ်လုပ်ငန်း စရိတ်စကမြင့်တက်လာခဲ့ပြီး စူးအက်တူးမြောင်း လစဉ်ဝင်ငွေလည်း ကျဆင်းလာခဲ့ရသည်။
ဟူသီအုပ်စု၏လုပ်ရပ်ကြောင့် ၂ဝ၂၄ ခုနှစ်အတွင်း အီဂျစ်နိုင်ငံအနေဖြင့် စူးအက်တူးမြောင်းမှ ဝင်ငွေအမေရိကန်ဒေါ်လာ ခုနစ်ဘီလီယံနီးပါး ဆုံးရှုံးခဲ့ရကြောင်း အီဂျစ်သမ္မတကပြောခဲ့ဖူးသည်။
ရိုက်တာ
