မုံရွာမြို့တွင် စက်ဘီးရောင်းအား ကောင်းနေ
-----------------------
စစ်ကိုင်းတိုင်းဒေသကြီး၊ မုံရွာမြို့မှာ အခုနှစ် ဇွန်လက စတင်ကာ စက်ဘီး ရောင်းအားကောင်းပြီး ဈေးတက်နေ တယ်လို့ စက်ဘီရောင်းဝယ်ရေးဆိုင်တွေဆီက သိရပါတယ်။ အရင်က တစ်ရက်ကို စက်ဘီး လေးစီး၊ ငါးစီး လောက်ပဲ ရောင်းနေရာကနေ အခုရက်ပိုင်းမှာ တစ်ရက်ကို ၁၀ စီးလောက် ရောင်းနေရတာဖြစ်ပြီး ရာသီဥတု အခြေအနေအရ ပစ္စည်းမလာတာနဲ့ သယ်ယူစရိတ်ကားခတွေ မြင့်တက်နေတာကြောင့် စက်ဘီးဈေးတွေကတော့ မြင့်တက်သွားတယ်လို့ ဆိုပါတယ်။
စက်ဘီးတစ်စီးကို အနိမ့်ဆုံး ကျပ် တစ်သိန်းခွဲကနေ အမြင့်ဆုံး ကျပ် ၁၅ သိန်း တန်အထိ စျေးရှိနေပြီး ကျပ် လေးသိန်းခွဲ၊ ငါးသိန်းတန်ကနေ ကျပ် ၁၃ သိန်းတန်အထိ စက်ဘီးအမျိုးအစား တွေက အရောင်းအဝယ် ဖြစ်နေတယ်လို့ မုံရွာမြို့ စက်ဘီးရောင်းဝယ်ဆိုင်တစ်ဆိုင်က တာဝန်ရှိသူတစ်ယောက်က ပြောပါတယ်။ စျေးကွက်ထဲမှာ ရောင်းအားအကောင်းဆုံး စက်ဘီးအမျိုးအစားကတော့ တရုတ်နိုင်ငံထုတ် Fises (ဖစ်) စက်ဘီး အမျိုးအစားတွေ ဖြစ်တယ်လို့ သိရပါတယ်။
