မကွေးနှင့် မုံရွာမြို့အနီးတွင် မြေငလျင်ငယ်တစ်ကြိမ်စီ တစ်ချိန်တည်း ပြိုင်တူလှုပ်ရှားသွား
ယနေ့ အောက်တိုဘာ (၃)ရက် ၊ နံနက်ပိုင်းက မြန်မာနိုင်ငံအတွင်း မကွေးမြို့အနီးနှင့် မုံရွာမြို့အနီးတို့တွင် မြေငလျင်ငယ်တစ်ခု တစ်ချိန်တည်း ပြိုင်တူ လှုပ်ရှားသွားခဲ့ကြောင်း မြေငလျင်သတင်းများစင်တာ၏ ထုတ်ပြန်ချက်အရ သိရသည်။
ယနေ့ အောက်တိုဘာ (၃) ရက် ၊ နံနက် (၇) နာရီ (၃၉) မိနစ်အချိန်က မြန်မာနိုင်ငံ ပြည်တွင်း၊ မကွေးတိုင်းဒေသကြီး မကွေးမြို့မှ တောင်ဘက်ပိုင်း၊ မင်းလှမြို့အရှေ့တောင်ဘက် ၁၃ မိုင်ခန့်အကွာ မြေအောက်အနက် (၇) မိုင်ခန့်မှ မဂ္ဂနီကျု ၄.၈ အဆင့် ငလျင်ငယ်တစ်ခု လှုပ်ခတ်သွားခဲ့ခြင်း ဖြစ်သ ည်။
အလားတူ အဆိုပါ မြေငလျင်လှုပ်ရှားစဉ် မုံရွာမြို့မှ အနောက်ယွန်းယွန်း၊ ဂန့်ဂေါမြို့ အရှေ့တောင်ဘက်ပိုင်း၊ ကျောမြို့အနီးရှိ တောင်တန်းဒေသတွင် အနက် (၆၁) မိုင်မှ မဂ္ဂနီကျု (၄.၂) အဆင့်ရှိ မြေငလျင်ငယ်လည်း တစ်ချိန်တည်း ပြိုင်တူ လှုပ်ရှားသွားခဲ့ကြောင်း မြေငလျင်သတင်းများစင်တာ၏ တိုင်းထွာရရှိချက်အရ သိရသည်။
