မူဆယ်မြို့ ဆင်ဖြူဂိတ်မှ အေးခဲအသားအပါအဝင် အခြားလူသုံးကုန်ပစ္စည်းများ သယ်ဆောင်ခွင့်မပြု
တရုတ်-မြန်မာ နယ်စပ် မူဆယ်မြို့ အတွင်းသို့ တရုတ်နိုင်ငံဘက်မှ မီးဖိုချောင်းသုံးအသီးအနှံနှင့် သားငါးများကို ယမန်နေ့ နိုဝင်ဘာ (၃၀)ရက်မှ စတင်၍ သယ်ဆောင်ခွင့်ပြုပြီဖြစ်သော်လည်း အေးခဲအသားအပါအဝင် အခြားလူသုံးကုန်ပစ္စည်းများနှင့် ကန့်သတ်ကုန်ပစ္စည်းများသယ်ဆောင်ခွင့်မပြုဘဲ စစ်ဆေးတွေ့ရှိပါက အရေးယူသွားမည်ဖြစ်ကြောင်း ဆင်ဖြူဂိတ် စစ်ဆေးရေးအဖွဲ့က ယနေ့တွင် အသိပေးထားသ ည်။
ယနေ့ ဒီဇင်ဘာ (၁) ရက် ဆင်ဖြူဂိတ်မှတဆင့် တရုတ်ပြည်ဘက်သို့ ဝင်ထွက်သွားလာကြမည့် ယာဉ်နှင့်ဆိုင်ကယ်များအနေဖြင့် ခွင့်ပြုမိန့်ပါရှိရမည့်အပြင် သတ်မှတ်ကုန်ပစ္စည်းများကိုသာ သယ်ဆောင်ခွင့်ပြုမည်ဖြစ်ကြောင်း သိရသည်။
အလားတူ အိမ်စီးကား၊ လက်တွန်းလှည်းနှင့် စက်ဘီးများဖြင့် သယ်ဆောင်ခွင့်မပြုဘဲ ဆိုင်ကယ်ဖြင့်သယ်ဆောင်ရာတွင် သတ်မှတ်ကုန်ပစ္စည်းများ အရှေ့တစ်ထုတ် အနောက်တစ်ထုတ်သာ သယ်ဆောင်ခွင့်ပြုမည်ဖြစ်ကြောင်း အသိပေးထားသည်။
တရုတ်နိုင်ငံဘက်မှ ပစ္စည်းသယ်ဆောင်ခွင့်အတွက် နိုဝင်ဘာ (၂၈) ရက်နှင့် (၂၉) ရက်တို့တွင် မူဆယ်မြို့ ကုန်သည်ကြီးများအသင်းရုံးတွင် စာရင်းပေးသွင်းထားရပြီး၊ စာရင်းပေးသွင်းထားသော ယာဉ်များကို အများရှေ့တွင် မဲနှိုက်၍ ဆင်ဖြူဂိတ်မှ ဝင်ရောက်ရမည့် ရက်အသီးသီးကို သတ်မှတ်ပေးထားကြောင်း မူဆယ်ကုန်သည်ကြီးများအသင်းထံက သိရသည်။
