Part-4
အမျိုးသားစာပေ တသက်တာစာပေဆုရ ဆရာမောင်သာနိုး အမှတ်တရ
ဆရာနိုးက တစ်ခုမဟုတ်တစ်ခု လေ့လာအားထုတ်နေတတ်သူ၊ ဝီရိယ ကောင်းသူပါ။ သူ့အိမ်မှာ စာရေး၊ စာဖတ်၊ ရေဒီယိုနားထောင်၊ နိုင်ငံခြားဘာသာ “လေ့လာ၊ ဘာသာဗေဒ လေ့လာ စုံလို့ပါပဲ။ ကျွန်တော်နဲ့တော့ မကြာခဏ ဆုံတတ် ပါတယ်။ မကြာခဏ ရန်ကုန်တက္ကသိုလ်ဘက်၊ ဘာသာပြန်ဌာန ဆရာဂျမ်းကို အဖွဲ့နဲ့ ဆုံကြပါတယ်။ အားလပ်တဲ့ရက်မှာ တစ်ခါတလေ ကျွန်တော်နဲ့ ဆရာနိုးနိုင်ငံခြားရုပ်ရှင်တွေ ကြည့်တတ်ပါတယ်။ ရုပ်ရှင်လက်မှတ်ရဖို့ တန်းစီတိုးရတဲ့ ခေတ်ပေါ့။
ကျွန်တော့်အစ်ကို ဦးကိုးမြင့် - ဒေါ်ခင်စန်းရီတို့နေတဲ့ ကျောက်မြောင်းအိမ် မှာ လိုက်နေစဉ် သူတို့က စာအုပ်ထုတ်ဝေရေးလုပ်ငန်းလုပ်ဖို့ အရင်းအနှီးထုတ်ပေး ပါတယ်။ ကျွန်တော်နဲ့ မေမြို့ မိုးကြည် စာပေစိစစ်ရေးသွားလျှောက်လို့ သန်းဌေး စာပေ စာအုပ်ထုတ်ဝေခွင့်ရပါတယ်။ ဒါနဲ့ ဆရာဂျမ်းနဲ့ တိုင်ပင်ပြီး စာအုပ်ထုတ် ကြပါတယ်။ ဆရာဂျမ်းရွေးပေးတဲ့ နာမည်တွေထဲက “လင်းကြက်”စာအုပ်တိုက် ဆိုတာကို ကျွန်တော်က ရွေးမိသွားပါတယ်။ ဆရာနိုးက “လင်းကြက်”ဆိုတော့ “Dawn Cock”ပေါ့တဲ့။ ဆရာပေါ်ဦးသက်က မြို့မငြိမ်းရေးတဲ့ နှစ်ပိဿာခွဲ သီချင်းဆိုရင်း လင်းကြက်ပုံဆွဲပေးပါတယ်။ ဆရာဂျမ်းက လင်းကြက်တံဆိပ်နဲ့ တွဲထည့်ဖို့ လင်းကြက်အဆော် ကွင်းထက်မှာ တူပျော်ပျော်နဲ့ စည်တော်ကို ရည်မျှော် မှန်းကာပ ရောင်နီမှာ အောင်စည်ရွှမ်းရအောင်... (မင်းသုဝဏ်)လို့ ရေးပေးပါတယ်။ ဒါနဲ့ သန်းဌေးစာပေ၊ လင်းကြက်စာအုပ်တိုက်၊ ၁၄ သတိပဌာန်လမ်း၊ ကျောက် မြောင်း ဆိုပြီး စာအုပ်ထုတ်ဝေရေးလုပ်ငန်း လုပ်ဖြစ်သွားပါတယ်။ ဆရာနိုးတို့၊ ဆရာဂျမ်းတို့၊ ဆရာ မေမြို့ မိုးကြည်တို့ ဆရာပေါ်ဦးသက်အဖွဲ့ တို့နဲ့တိုင်ပင် လုပ်ဆောင်ကြတာမို့ အဲဒီအချိန်တုန်းက ကျွန်တော်တို့ စာအုပ်ထုတ်ဝေရေး အောင် မြင်ပါတယ်။ ကျွန်တော်တို့စာအုပ်တိုက်က ထုတ်ဝေတဲ့ တင်မိုးရဲ့ “ထီးကလေးနဲ့ မနီ” ကဗျာစာအုပ်က အမျိုးသားစာပေဆု ရပါတယ်။
တစ်နေ့တော့ ကျွန်တော်နဲ့ ဆရာနိုး စပ်မိစပ်ရာ ပြောကြရာက ကျွန်တော်က ဆရာနိုးကို “ကျွန်တော် ချားလ်စ်ဒစ်ကင်းရဲ့ ဒေးဗစ်ကော်ပါဖီးလ် စာအုပ်ကို ဘာသာ ပြန်မယ်။ ဆရာနိုး တည်းဖြတ်ပေးမလား” မေးမိတယ်။ ဆရာနိုးက “ကောင်းတာ ပေါ့ဗျာ၊ လုပ်ကြတာပေါ့”တဲ့။ ဒါနဲ့ ကျွန်တော် အဲဒီစာအုပ်ကို ဘာသာပြန်တယ်။ ဆရာနိုးက ဂရုတစိုက် တည်းဖြတ်ပေးတယ်။ တည်းဖြတ်သူရဲ့အမှာ- ဆိုပြီး အမှာစာ ရေးပေးတယ်။ စာအုပ်ရိုက်ဖို့ ဆရာဂျမ်းကလည်း လာရောက်အကြံပေး ကူညီတယ်။ ဒီလိုနဲ့ ကျွန်တော် ဘာသာပြန်တဲ့ ဒေးဗစ်ကော်ပါဖီးလ်စာအုပ် ပထမတွဲကို ၁၉၇၃ ၈ နိုဝင်ဘာလမှာ ထုတ်နိုင်ခဲ့ပါတယ်။ အခုအခါမှာတော့ ချားလ်စ်ဒစ်ကင်း ရဲ့ အကောင်းဆုံးလက်ရာဖြစ်တဲ့ ဒေးဗစ်ကော်ပါဖီးလ် ဝတ္ထုစာအုပ် အစ-အဆုံး ထုတ်ဝေပြီးပါပြီ။ ဆရာနိုးတို့ ဆရာဂျမ်းတို့ ကျေးဇူးတရားကို အောက်မေ့တသ သတိရ လွမ်းဆွတ်နေရပါတယ်။
#ဆက်ရန်ရှိ
