ယူနိုက်တက်ဖလား အမေရိကန်အသင်း ရရှိ
-------------------------
ပိုလန်တင်းနစ်မယ် ဆွီယာတက်ခ်ကို အမေရိကန် တင်းနစ်မယ် ကိုကိုဂတ်ဖ် အနိုင်ရခဲ့တာနဲ့အတူ ယူနိုက်တက် ဖလား အသင်းလိုက်တင်းနစ် ချန်ပီယံဆုကို အမေရိကန်အသင်း ရရှိသွားခဲ့ပါတယ်။ ဩစတြေးလျနိုင်ငံ ဆစ်ဒနီ မြို့မှာ ကျင်းပခဲ့တဲ့ ၂၀၂၅ ယူနိုက်တက်ဖလားပြိုင်ပွဲရဲ့ ဗိုလ်လုပွဲမှာ အမေရိကန်အသင်းနဲ့ ပိုလန်အသင်းတို့ အကြိတ်အနယ် ယှဉ်ပြိုင်ခဲ့ကြတာပါ။
ဗိုလ်လုပွဲရဲ့ ပထမပွဲစဉ်အဖြစ် အမျိုးသမီးတစ်ဦးချင်းပွဲကို ယှဉ်ပြိုင်ခဲ့ရာမှာ ကိုကိုဂတ်ဖ်က ဆွီယာတက်ခ်ကို (၆း၄၊၆း၄)နဲ့အနိုင်ရခဲ့ပါတယ်။ အဲဒီနောက် ဒုတိယပွဲစဉ်အဖြစ် အမျိုးသား တစ်ဦး ချင်းပွဲကို ယှဉ်ပြိုင်ရာမှာလည်း အမေရိကန်အသင်းသား တိုင်လာဖရစ်ဇ်က ပိုလန်အသင်းသား ဟာကက်ဇ်ကို (၆း၄၊၅း၇၊၇း၆)ဆိုတဲ့ရလဒ်နဲ့ အနိုင်ရခဲ့ပါတယ်။
ဒါကြောင့် တတိယပွဲစဉ်ဖြစ်တဲ့ နှစ်ယောက်တွဲပွဲကို ဆက်လက် ယှဉ်ပြိုင်ဖို့ မလိုတော့ဘဲ ၂ ပွဲပြတ်အနိုင်ရထားတဲ့ အမေရိကန်အသင်းက ချန်ပီယံဆုကို ရရှိသွားခဲ့တာဖြစ်ပါတယ်။ ၂၀၂၃ မှာစတင်ကျင်းပတဲ့ ယူနိုက်တက်ဖလား ပြိုင်ပွဲရဲ့ ချန်ပီယံဆုကို အမေရိကန်အသင်း ပထမဆုံးအကြိမ် ရရှိခဲ့တာဖြစ်ပြီး အမေရိကန်တင်းနစ်မယ် ကိုကို ဂတ်ဖ်အနေနဲ့လည်း မကြာခင်မှာ ကျင်းပမယ့် ဩစတြေးလျ အိုးပင်းအတွက် အဆင်သင့်ဖြစ်နေပြီဆိုတာကို အခုပြိုင်ပွဲမှာ ပြသနိုင်ခဲ့တာလည်း ဖြစ်ပါတယ်။
