၂၀၂၀ရွေးကောက်ပွဲအရှုံးကိုပြောင်းလဲရန်_အကြမ်းဖက်လှုံ့ဆော်ရာတွင်_ထရမ့်ပါဝင်ခဲ့
----------------------------------------------------------------------------------
အမေရိကန်ရှေ့နေချုပ် မားရစ် ဂါလန်က ဒေါ်နယ်ထရမ့်ကို စုံစမ်းစစ်ဆေးမှုနဲ့
၂၀၂၀ ရွေးကောက်ပွဲကို လွှမ်းမိုးဖို့ ကြိုးပမ်းမှုများဆိုင်ရာ အထူးအစိုးရရှေ့နေ ဂျက်စမစ်ရဲ့ အစီရင်ခံစာကို ဒီနေ့ လူသိရှင်ကြား ထုတ်ပြန်လိုက်ပါတယ်။
ရွေးကောက်ခံသမ္မတရဲ့ ရာဇ၀တ်မကင်းတဲ့ ကြိုးပမ်းမှုတွေနဲ့ စုံစမ်းစစ်ဆေးမှုအပေါ် တရားရေးဌာနရဲ့ ယုံကြည်မှုကို ပြသလိုက်တာပါ။
ထရမ့်ဟာ ၂၀၂၀ ရွေးကောက်ပွဲရှုံးနိမ့်ခဲ့တုန်းက ရလာဒ်ကို လွှမ်းမိုးဖို့ မကြုံစဖူး ရာဇ၀တ်မကင်းတဲ့ ကြိုးပမ်းမှုမှာ ပါဝင်ခဲ့တယ်လို့ အထူးအစိုးရရှေနေ ဂျက်စမစ်က အစီရင်ခံစာထားပါတယ်။
၂၀၂၁ ဇန်နဝါရီ ၆ ရက် အဓိကရုဏ်းတွေမှာ ထရမ့်ဟာ သူ့ထောက်ခံသူတွေကို ရုပ်ပိုင်းအကြမ်းဖက်မှုတွေ ကျူးလွန်ဖို့ လှုံ့ဆော်ခဲ့ပြီး ၂၀၂၀ ရွေးကောက်ပွဲမှာ မဲလိမ်ခံရတယ်ဆိုတဲ့ ဇာတ်လမ်းအမှားကို မဟုတ်မှန်းသိသိနဲ့ ဖြန့်ခဲ့တယ်လို့ စမစ်က ဆိုထားပါတယ်။
ဒါပေမယ့် အဲဒီလို ၂၀၂၁ တုန်းက ထရမ့် အာဏာရအောင် ကြိုးပမ်းမှုနဲ့ပတ်သက်ပြီး ရုံးတင်စစ်ဆေးဖို့ ကြိုးပမ်းမှုတွေဟာ ၂၀၂၄ နိုဝင်ဘာမှာ ပြန်အရွေးခံရပြီးနောက် ပျက်ပြားသွားခဲ့တယ်လို့ တရားရေးဌာနက အခုထုတ်ပြန်လိုက်တဲ့ စမစ်ရဲ့ အစီရင်ခံစာမှာ ပြောထားပါတယ်။
ထရမ့်ရဲ့ ပူးပေါင်းကြံစည်သူတွေအပေါ် စွဲချက်တင်ရင် တရားမျှတနိုင်တယ် သူတွေ့ရှိခဲ့ပေမယ့် အပြီးသတ် ကောက်ချက်မချနိုင်ခဲ့ဘူးလို့ စမစ်က ပြောပါတယ်။ အကြောင်းကတော့ နိုဝင်ဘာ ရွေးကောက်ပွဲ အနိုင်ရပြီးနောက် စမစ်ဟာ ရာထူးမှ နုတ်ထွက်ခဲ့လို့ပါ။
တကယ်တော့ သမ္မတရာထူး ပြန်ရတော့မယ့်ထရမ့်အတွက် တရားခွင်မှာ ပြစ်ဒဏ်ချမှတ်ခံရဖို့နဲ့ စွဲချက်တင်နိုင်ဖို့ လုံလောက်တဲ့ သက်သေအထောက်အထားတွေ လုံလောက်တယ်လို့ အကဲဖြတ်ထားတယ် ဆိုပါတယ်။
အပြာမယ် စထရွမ်မီ ဒယ်နီယယ်ကို နှုတ်ပိတ်ခငွေပေးတဲ့ မှတ်တမ်းတွေ အတုလုပ်မှုနဲ့ ထရမ့်ကို စီရင်ချက်ချပြီးနောက် ရက်ပိုင်းအကြာမှာ စမစ်အစီရင်ခံစာ ထွက်လာတာပါ။
ထရမ့်ဟာ အထူးအစိုးရရှေ့နေ စမစ်ကို တစိုက်မတ်မတ် ဝေဖန်ခဲ့ပြီး သူ့ကိုဆန့်ကျင်အမှုလိုက်တဲ့စမစ်ကို ရာဇဝတ်ကြောင်း စွဲချက်တင်သင့်တယ်လို့ မဟာမိတ်တွေက ထရမ့်ကို အကြံပေးထားပါတယ်။
စမစ်ရဲ့ အစီရင်ခံစာကို ထရမ့်က စိတ်ပျက်စရာလို့ ပြောပြီး အတုအယောင်တွေ့ရှိချက်တွေလို့ ဝေဖန်ခဲ့ပါတယ်။
အစီရင်ခံစာနဲ့အတူ ထရမ့်ရှေ့နေတွေဆီကနေ ၂၀၂၅ ခုနှစ် ဇန်နဝါရီ ၆ ရက်စွဲနဲ့ တရားရေးဌာနကို ပေးပို့ထားတဲ့ စာတစ်စောင်ကိုပါ တရားရေးဌာနက ထုတ်ပြန်ခဲ့ပါတယ်။ စာထဲမှာ စမစ်လုပ်ခဲ့တာ ဘိုင်ဒင်အစိုးရကိုယ်စားဖြစ်လို့ မကောင်းတဲ့ယုံကြည်မှုနဲ့ ခရူးဆိတ်စစ်ပွဲလိုဖြစ်လို့ အစီရင်ခံစာ ပြင်ဆင်မှုနဲ့ ထုတ်ပြန်ဖို့ ကြိုးပမ်းမှုအားလုံးကို ရပ်စဲဖို့ စမစ်ကို တောင်းဆိုထားပါတယ်။
စမစ်က အထူးအစိုးရရှေ့နေအနေနဲ့ သူ့ဆုံးဖြတ်ချက်တွေဟာ ဘိုင်ဒင်အစိုးရ ဒါမှမဟုတ် တခြားနိုင်ငံရေး ဇာတ်ကောင်တွေ လွှမ်းမိုးခံရတယ်လို့ ထရမ့်ပြောတာ ရယ်စရာကောင်းတယ်လို့ တုံ့ပြန်ခဲ့ပါတယ်။
စမစ်ဟာ ထရမ့် ရွေးကောက်ပွဲ မနိုင်ခင်ကထဲက တရားဝင် အတားအဆီးတွေနဲ့ ရင်ဆိုင်ခဲ့ရပါတယ်။ အမေရိကန်သမ္မတ ဒါမှမဟုတ် စစ်သေနာပတိချုပ် တာဝန်ထမ်းဆောင်စဉ်အတွင်း သူ့တရားဝင် ဆောင်ရွက်ချက်တွေအတွက် တရားမစွဲနိုင်ဘူးလို့ ရှေးရိုစွဲလွှမ်းမိုး(ထရမ့် ခန့်ထားသူ အများစုပါတဲ) တရားရုံးချုပ် ဆုံးဖြတ်ချက်ကြောင့် စမစ်ဟာ ထရမ့်အပေါ် တရားစွဲဆိုမှုကို လပေါင်းများစွာ ဆိုင်းငံ့ထားခဲ့ရပါတယ်။
သမ္မတဟောင်းတွေကို ရာဇဝတ်ကြောင်းဆိုင်ရာ တရားစွဲမှုတွေကနေ ကျယ်ကျယ်ပြန့်ပြန့် လွတ်ငြိမ်းခွင့်ပေးဖို့ တရားရုံးချုပ်နဲ့ စမစ် သဘောတူခဲ့ရပါတယ်။
တရားမစွဲပေမယ့် ထရမ့်အပြစ်ရှိကြောင်း အစီရင်ခံစာ ထုတ်ပြန်လိုက်တာြဖစ်ပြီး တခြား စွပ်စွဲချက်တွေ ပါပါသေးတယ်-
• ၂၀၂၀ မှာ ထရမ့်ဟာ ပြည်နယ်အဆင့် ဥပဒေပြုလွှတ်တော်တွေ၊ အမှုဆောင်အရာရှိတွေနဲ့ ဆက်သွယ်ခဲ့ပြီး "မဲရေတွက်တာကို လျစ်လျူရှုပြီး ရလဒ်ပြောင်းအောင် အရေးယူဆောင်ရွက်ဖို့ တိုက်တွန်းခဲ့တယ်
• ထရမ့်နဲ့ ပူးပေါင်းကြံစည်သူတွေဟာ ၂၀၂၀ ရွေးကောက်ပွဲ သူရှုံးခဲ့တဲ့ ပြည်နယ် ခုနစ်ခုမှာ မသမာတဲ့ မဲဆန္ဒရှင်တွေဆိုပြီး ဝါရှင်တန်ဒီစီကို မှားယွင်းတဲ့ အသိအမှတ်ပြုလက်မှတ်တွေပေးပို့ဖို့ အစီအစဉ်ကို စတင်ခဲ့တယ်။
• ၂၀၂၀ ရွေးကောက်ပွဲမှာ များပြားတဲ့ လိမ်လည်မှုအထောက်အထားတွေ မဖော်ထုတ်နိုင်တဲ့အတွက် တရားရေးဌာနကို စိတ်ပျက်မိပြီး သူ့လိမ်လည်တောင်းဆိုမှုတွေ ဆက်တည်မြဲအောင်နဲ့ ရာထူးဆက်ရအောင် ဖက်ဒရယ်အာဏာကို ကိုင်စွဲဖို့ ထရမ့် ကြိုးပမ်းခဲ့တယ်
• ရွေးကောက်ပွဲရလဒ်ကို ပြောင်းလဲကြေညာဖို့ အထက်လွှတ်တော်ဥက္ကဌ တာဝန်ယူရတဲ့ ဒုသမ္မတ မိုက်ပန့်စ်ကို အကြိမ်ကြိမ် ဖိအားပေးခဲ့ပြီး ပန့်စ်က အကြိမ်ကြိမ် ငြင်းဆိုခဲ့တယ်။
Ref; The Sky News
......
My Notes...
ထရမ့်ဟာ ပထမသက်တမ်းတုန်းကလည်း တရားရေးဌာနရဲ့ အထူးအစိုးရရှေ့နေ ရောဘတ်မြူလာ စုံစမ်းစစ်ဆေးတာ ခံခဲ့ရပြီး အခုတော့ ဂျက်စမစ်နဲ့ ရင်ဆိုင်ရပါတယ်။ ဒီရှေ့နေတွေက ထရမ့်ကိုထောင်ထဲတော့ မထည့်နိုင်ပေမယ့် နာမည်ဆိုးနဲ့ သမိုင်းတွင်ရစ်အောင်တော့ တတ်နိုင်တာ တွေ့ရပါတယ်။
Crd
