ထရမ့်၏ ဂရင်းလန်းသိမ်းရေးက ထိုင်ဝမ်ပိုင်ရေး တရုတ်အခွင့်အလမ်းဖြစ်လာ
ဘေကျင်း၊ ဇန်နဝါရီ ၁၆
အမေရိကန်ရွေးကောက်ခံသမ္မတ ဒေါ်နယ်ထရမ့် (Donald Trump) သည် မကြာသေးမီက ဂရင်းလန်းကျွန်းနှင့် ပနားမားတူးမြောင်းတို့ကို အင်အားသုံးပြီး ရယူသွားမည်ဆိုသည့် မှတ်ချက်စကားများကြောင့် ထိုင်ဝမ်ကို ပိုင်ဆိုင် ရေး တရုတ်အတွက် အခွင့်အလမ်းဖြစ်လာသည်ဟု ရိုက်တာမှ ဖော်ပြခဲ့သည်။
လွန်ခဲ့သည့် နှစ်ပေါင်းများစွာ ကတည်းက အမေရိကန်သည် ထိုင်ဝမ်နှင့်ပတ်သက်ပြီး တရုတ်ကို ထိန်းထိန်းသိမ်း သိမ်း ဆောင်ရွက်ရန်နှင့် ထိုင်ဝမ်အပေါ် ခြိမ်းခြောက်မှုများလျှော့ချရန် တိုက်တွန်းခဲ့သည်။
သို့သော် လက်ရှိတွင် ထရမ့်က ဂရင်းလန်းကျွန်းကို အင်အားသုံး သိမ်းယူမည်ဟု အရိပ်အမြွက် ပြောကြားခဲ့မှု ကြောင့် ထိုင်ဝမ်အရေးတွင် ယခင် အမေရိကန်အစိုးရများ၏ ရပ်တည်ချက်များကို လျော့ပါးစေခဲ့သည်။
ထိုင်ဝမ်အရေးနှင့်ပတ်သက်ပြီး စစ်ရေးအရ ထိပ်တိုက်တွေ့မည့် အခြေအနေနှင့်ပတ်သက်ပြီး ထင်ကြေးပေးမှုများ သည် မကြာမီအချိန်အတွင်း ပြောင်းလဲလာနိုင်သည်ဟု ကျွမ်းကျင်သူများက သုံးသပ်နေကြသည်။
အချို့ကမူ ထရမ့်သည် အမေရိကန်၏ သံတမန်ဆက်ဆံရေး စံနှုန်းများကို ပြောင်းလဲပစ်နိုင်သဖြင့် ထိုအခြေအနေ သည် ထိုင်ဝမ်အရေးနှင့်ပတ်သက်ပြီး တရုတ်အတွက် အခွင့်အလမ်းများ ပေါ်ပေါက်လာစေနိုင်သည်ဟု သုံးသပ်ခဲ့ ကြသည်။
ရှန်ဟိုင်း (Shanghai) မြို့ရှိ ဖူဒန်တက္ကသိုလ် ( Fudan University) မှ နိုင်ငံတကာလေ့လာရေးဌာန၏ ပါမောက္ခ တစ်ဦးဖြစ်သူ ကျိုးမင်ဟောင် (Zhao Minghao) ကမူ ဂရင်းလန်းကျွန်း၊ ပနားမားတူးမြောင်း၊ ကနေဒါတို့နှင့် ပတ်သက်သည့် ထရမ့်၏ ခြိမ်းခြောက်မှုများကို အလေးအနက်ထား ဆင်ခြင်သုံးသပ်ရန် လိုအပ်သည်ဟု ပြောကြားခဲ့သည်။
သို့သော် ထရမ့်သည် ထိုင်ဝမ်အရေးကဲ့သို့ အတိမ်းအစောင်းမခံသည့် ပြဿနာများနှင့်ပတ်သက်ပြီး သဘောထား တင်းမာခဲ့သည့်တိုင် သူသည် သဘောတူညီချက် ရရှိအောင် လုပ်ဆေင်နိုင်သူ တစ်ဦးဖြစ်ကြောင်း တရုတ်နိုင်ငံရှိ လူအများစုက ယူဆထားဆဲဖြစ်သည်။
တရုတ်နိုင်ငံခြားရေးဝန်ကြီးဌာနကမူ ဂရင်းလန်းကျွန်းနှင့် ထိုင်ဝမ်အား ချိတ်ဆက်ပုံဖော်သည့် ထင်မြင်ယူဆချက် များကို အခြေအမြစ်မရှိကြောင်း ထုတ်ပြန်ခဲ့သည်။
“ထိုင်ဝမ်အရေးက တရုတ်ရဲ့ ပြည်တွင်းရေး ဖြစ်ပါတယ်။ ထိုင်ဝမ်အရေးကို ဘယ်လိုဖြေရှင်းမလဲဆိုတာ တရုတ်ပြည်သူတွေနဲ့ပဲ သက်ဆိုင်ပါတယ်” ဟု တရုတ်နိုင်ငံခြားရေးဝန်ကြီးဌာနက ကြေညာချက် ထုတ်ပြန်ခဲ့သည်။
Source: ရိုက်တာ
ပုံ - ဒေါ်နယ်ထရမ့်နဲ့ ရှီကျင့်ဖျင်ကို တွေ့ရစဉ်
#centralnewsnaypyitaw
