OpenAI ကို ဝယ်ဖို့ ဈေးပေးလိုက်တဲ့ အီလွန်မတ်စ်
အီလွန်မတ်စ်က သူကြည့်မရတဲ့ OpenAI ကို ဘီလျံရာဂဏန်းနီးနီး ပေးပြီး ဝယ်ဖို့ ကမ်းလှမ်းလိုက်ပါတယ်။
မတ်စ်ဦးဆောင်တဲ့ အဖွဲ့က OpenAI ကို ထိန်းချုပ်ထားတဲ့ nonprofit အဖွဲ့ကို ဒေါ်လာ ၉၇.၄ ဘီလျံနဲ့ ဝယ်မယ်ဆိုပြီး ပြောလာလို့ပါ။ Twitter ကို ဝယ်တုန်းတဲ့ ပေးခဲ့တဲ့ ပမာဏရဲ့ နှစ်ဆမကတဲ့ ပမာဏပါ။ ဒါပေမယ့် OpenAI ရဲ့ တန်ဖိုးကလည်း အီလွန်မတ်စ်ပေးတာရဲ့ ၃ ဆမက ရှိပါတယ်။
ပြီးခဲ့တဲ့လကုန်အထိ CNBC က တွက်ထားတဲ့အချက်အလက်အရဆို OpenAI တန်ဖိုးက ဒေါ်လာ ၃၄၀ ဘီလျံထက်မနည်း ရှိပါတယ်။ SoftBank က ရှယ်ယာ ၁၅ ဘီလျံနဲ့ ၂၅ ဘီလျံကြား ထည့်ဝင်တာ အပါအဝင် ဒေါ်လာ ဘီလျံ ၄၀ လောက် ထပ်ရဖို့ ရှိတဲ့အပေါ် တွက်ထားတာပါ။
OpenAI က လက်ရှိ CEO ဆမ်အော့မန်နဲ့တွဲပြီး အီလွန်မတ်စ် ထောင်ခဲ့တဲ့ အဖွဲ့အစည်းပါ။ စကားစပ်လို့ ပြောရရင် ChatGPT နဲ့ ပေါက်သွားတဲ့ OpenAI မှာက အကျိုးအမြတ်မယူတဲ့ non-profit OpenAI Inc နဲ့ အီလွန်မတ်စ် ထွက်ပြီးနောက် ထောင်လိုက်တဲ့ အကျိုးအမြတ်ယူတဲ့ လုပ်ငန်းခွဲ OpenAI Global ဆိုပြီး ရှိပြီးပါတယ်။
၂၀၁၉ မှာ စတင်ခဲ့တဲ့ OpenAI Global မှာ ဒေါ်လာ ၁၃ ဘီလျံ ထည့်ထားတဲ့ Microsoft က ရှယ်ယာ ၄၉% လောက် ပိုင်ပါတယ်။ ပိုက်ဆံရှာတဲ့ OpenAI Global က OpenAI Inc ရဲ့ လက်အောက်ခံ လုပ်ငန်းပါ။
အီလွန်မတ်စ်ကတော့ သူထောင်ခဲ့တဲ့ OpenAI ကို အကျိုးအမြတ်မယူအဖွဲ့အစည်းကနေ ငွေရှာတဲ့လုပ်ငန်းပြောင်းလို့ ဆိုပြီး ရုံးတင်တရားစွဲထားတာ ရှိပါတယ်။ နောက်ပြီး OpenAI က ခေါင်းဆောင်ထားတဲ့ Oracle , SoftBank တို့နဲ့ ဘီလျံ ၅၀၀ တန် Stargate ပရောဂျက်ကို ကြေညာတော့လည်း မတ်စ်က ဝေဖန်ထားပါတယ်။
OpenAI ကို Open-Source ဖြစ်ပြီး ဘေးကင်းရေးဦးစားပေးအဖွဲ့ဖြစ်အောင် လုပ်ဖို့ အချိန်တန်ပြီ ၊ ဖြစ်အောင် လုပ်မယ်လို့လည်း မတ်စ်က ပြောဖူးပါတယ်။ ဒီလို ပြဿနာတွေကြားထဲက OpenAI ကို ဝယ်မယ်ဆိုပြီး ထပြောတာလာတာပါ။
အော့တ်မန်ကတော့ ဒီသတင်းကြားကြားချင်း X ပေါ်မှာ "ရတယ် ကျေးဇူး။ မင်းဆန္ဒရှိရင် Twitter ကို ဒေါ်လာ ၉,၇၄ ဘီလျံနဲ့ ငါတို့ ဝယ်မယ်" ဆိုပြီး ချက်ချင်း ငြင်းကလိလုပ်ထားပါတယ်။
