သက္ကတ ဘာလို့ သင်ရမှာလဲ
သက္ကတသင်တာက စိတ်အသိဆိုင်ရာ ပညာရပ်များ၊ ရှေးလျှို့ဝှက်ပညာရပ်များကို ပြန်လည်ဖော်ထုတ်စူးစမ်းဖို့ဖြစ်ပါတယ်။ ဝေဒကျမ်း၊ ဝေဒင်္ဂကျမ်း၊ ဥပဝေဒကျမ်း၊ ပုရာဏ်ကျမ်း၊ ဣတိဟာသကျမ်းများနှင့် သျှာသ္တြနှင့် ကလာပညာရပ်များကို လေ့လာစူးစမ်းဖို့ ဖြစ်ပါတယ်။
ကျနော့်အတွက်ကတော့ ဘာသာဗေဒနယ်ဆိုင်ရာ ဒဿနအတွေးအမြင်များ နှိုက်ယူဆင်ခြင် တိုးချဲ့ယူခဲ့တဲ့ နေရာဖြစ်ပါတယ်။
သက္ကတပြန်သင်ပေးမယ်ဆိုရင် သင့်လျော်တဲ့ ဗမာဆရာဟာ ကျနော့်လို လူကသာ သင့်လျော်တဲ့ဆရာဖြစ်နိုင်ပါတယ်။ တက္ကနျာယကျမ်း၊ ဒဿနကျမ်း၊ အတ္ထသျှာသ္တြ၊ ကာမသျှာသ္တြ၊ သံဂီတကျမ်း စတဲ့စတဲ့ ကျမ်းတွေကို ကျက်စားဖူး၊ ကျင်လည်ဖူးရမယ်။
ဇျောတိသ်ကျမ်းတွေမှာ ဂဏိတဘက်မှာ သိဒ္ဓါန္တသိရောမဏိကျမ်း၊ ဂြဟသိဒ္ဓါန္တကျမ်း၊ ကရဏကျမ်း၊ ရေခါကျမ်းမျိုးစုံ၊ ဖလိတဘက်မှာ ဗၒဟတ်၊ သာရာဝလီ၊ ဖလဒီပိကာ၊ ဥတ္တရကာလာမၒတ စတဲ့ကျမ်းတွေ၊ ဒီထဲမှာလည်း ပရာသရနဲ့ ဇေမိနီ မတူတဲ့စနစ်ကွဲတွေ၊ နက္ခတ္တိကဒသာနဲ့ ဝိသောတ္တရိဒသာ ခြင်းရာမတူတဲ့စနစ်တွေ၊ မူလ ဂေါစာ မဟာကာလပြဿနာစတဲ့ကျမ်းတွေကိုလည်း ရင်းနှီးကျွမ်းဝင်ပါတယ်။ ဇျောတိသၐဗ္ဒကောၐ အဘိဓာန်ရဲ့ ပဉ္စင်္ဂ ပြက္ခဒိန်ဗိုလ်ခန်းကနေ ယောဂအသုံးအနှုံးများအထိ စာကို ဘယ်လိုကြည့်ရမယ်၊ ဘယ်အပိုင်း ဘယ်အခန်းက ဗမာသိဘယ်လိုယှဉ်ထားရမယ်လို သာမန်သက္ကတတတ်ဘုန်းကြီးများ ပြပေးဖို့ မလွယ်ပါဘူး။
ပဋိမာနဲ့ ဝါသ္တုသျှာသ္တြဆိုင်ရာ (ဗာစတု လို့ ခေတ်ဗမာဗေဒင်ဆရာတွေ သုံးတဲ့ ဝတ္ထုသတ္ထ) မယတကျမ်း၊ သာဓနမာလာကျမ်း စတဲ့ Architecture and Iconography ကိုလည်း ကျနော်တို့ ပြညွှန်မှ ပိုလွယ်ကူပါလိမ့်မယ်။ နာဋျကျမ်း၊ အဘိနယကျမ်း၊ အလင်္ကာကျမ်းဆိုတာတွေလည်း ကျနော်တို့က ပိုရင်းနှီးပါတယ်။
အာယုရ်္ဝေဒကျမ်းများမှာလည်း စရက၊ သုဿုတ၊ အဋ္ဌင်္ဂဟဒယ၊ ရသဂင်္ဂါဓရဆိုတာတွေကို ကျနော်တို့ ရင်းနှီးပါတယ်။ တန္တရ၊ မန္တရဆိုတာလည်း ကျနော်တို့ ရင်းနှီးတယ်။
အထူးသဖြင့် ကောသကျမ်း၊ ဗျာကရဏကျမ်း၊ နိဂဏ္ဍုကျမ်းတွေရဲ့ ဘာသာဗေဒကိစ္စတွေက ကျနော်နဲ့ လိုက်တုပြောဖို့ ခက်မှာ ကိုလည်း ကျနော်တို့ ပြောနိုင်ပါတယ်။
ပြောရရင်တော့ ကျနော်ဟာ သက္ကတကို ပါဠိကနေ အလွယ်ကူးလာ သိလာခဲ့တာမှာ အဲဒါက အဆန်းမဟုတ်လှဘူး။ ကျမ်းတွေ ချဉ်းကပ်တတ်မြောက်ထားတာမှာသာ သာမန်သက္ကတကျောင်းသားတွေထက် ပိုအားသာချက်တွေ ရှိနေခဲ့တယ် ဆိုတာပါ။
ဒါပေမယ့်
ကျနော့် သက္ကတသင်တန်းကို စိတ်ဝင်စားတဲ့ကျောင်းသားများကို ကျနော်နဲ့ အားပြိုင်ဖို့၊ ကျနော့်ကို အားတူရင် ကျန်တာ ကိုယ့်ဘာသာ မတွယ်မငြိ ကျင်လည်ကျက်စားဖို့ ကျနော်က ကူရုံပါ။ ကျနော်သင်ပေးလို့ တတ်မှာလို့ ကျနော်မယုံသလို ကျနော့်ကိုယ် ကျနော်လည်း AI သာ မရှိရင် သက္ကတသင်တန်းကို ယုံယုံကြည်ကြည် ဖွင့်ပေးနိင်မယ်လို့ မထင်ပါ။
ကံဆုံလို့ ကြုံခွင့် ပြောခွင့် အားစမ်းခွင့် ပေးတယ်သာ ယူဆပါ။
***
အထက်က ပို့စ်တ်ဟာ လာမယ့် တနင်္လာည၉နာရီ Webinar: Sanskrit and its Contributions to Knowledge and Language အတွက် မာတိကာသဘောဖြစ်ပါတယ်။
ဆရာ ဦးဇော်မင်းဦး facebook page မှ ကူးယူဖော်ပြပါသည်။
