"မြေငူကျွန်း ဆံတော်ရှင်ဘုရားသမိုင်း"
မဟာသက္ကရာဇ် ၁၂၃-ခုနှစ် ဓညဝတီပြည်ရှင် စန္ဒသူရိယမင်းမြတ်၏ မနောအဓိဋ္ဌာန်ဖြင့် ပင့်လျှောက်ချက်အရ ဗုဒ္ဓမြတ်စွာဘုရားရှင်သည် ရက္ခပူရတိုင်း ရခိုင်ပြည်သို့ ကောင်းကင် ခရီးမှကြွတော်မူလာပြီး သီရိဂုတ္တကုန်းတော်တွင် ကိုယ်စားတော် မဟာမုနိရုပ်ပွားတော်မြတ်ကို သွန်းလုပ်ခွင့်ပြုခဲ့သည်။
မြတ်စွာဘုရားရှင်သည် ဓညဝတီပြည်မှ မဇ္စျိမဒေသသို့အပြန် ကောင်းကင်ခရီးမှ ကြွချီလာခဲ့ရာ ကစ္ဆပနဒီမြစ်အဆုံး သမုဒ္ဒရာပေါ် အရောက်တွင် ရေပြင်သည် လှိုင်းတံပိုးတို့ဖြင့် ဆူပွတ်ခဲ့ပြီး အရပ်ရှစ်မျက်နှာလုံး လရောင်ဖြင့်လင်းလက်လာခဲ့သည် ထိုအခြင်းအရာကို နဂါးမင်း ၈-ဦးတို့မြင်လေရာ မြတ်စွာဘုရား ကြွချီလာကြောင်းတွေ့ရှိ၍ ပင့်ဖိတ်ကာ ဆွမ်းကပ်လှူဒါန်းကြလေသည်။
မြတ်စွာဘုရားက နဂါးမင်းတို့အား ဆံတော်နှစ်ဆူကို ပေးသနားချီးမြှင့်ပြီး ဤဒေသ၌ ဗုဒ္ဓသာသနာတော် အရှည်ထွန်းကား တည်လတ္တံဟု ဗျာဒိတ်စကားပေးတော်မူကာ ဆက်လက်ကြွချီတော်မူခဲ့လေသည်။
နဂါးအပေါင်းတို့သည် ဗုဒ္ဓ၏ဆံတော်မြတ်ကိုယူကာ ဌာပနာတော်မူလျက် စေတီတော်မြတ်တစ်ဆူကို မြေငူကျွန်း နီလာပဗ္ဗတတောင်ထိပ်တွင် တည်ထားကိုးကွယ်ခဲ့ကြလေသည်။ စန္ဒသူရိယမင်းသည် ဆံတော်ရှင် စေတီတော်အား လာရောက်ဖူးမြော်လေရာ နဂါးတို့တည်သောစေတီတော်မှာ လူတို့တည်သော စေတီနှင့်မတူသည်ဖြစ်၍ မူလစေတီတော်ကိုငုံပြီးလျှင် မိမိ၏မကိုဋ်တော်နှင့်တူအောင် စေတီတော်ကို ပြန်လည်ပြုပြင်တည်ထားတော်မူခဲ့ပါသည်။
ထို့ကြောင့် ဆံတော်ရှင်ဘုရားသမိုင်း လင်္ကာထဲတွင် "လူနှင့်နဂါး တည်တုံငြားသည် ဘုရားဆံတော်ရှင် မြတ်ရှင်ပင်" ဟု ဖွဲ့နွဲ့စပ်ဆိုထားပါသည် ထို့နောက် ရခိုင်မင်းအဆက်ဆက်တို့နှင့် ရခိုင်ပြည်သူရခိုင်ပြည်သား အဆက်ဆက်တို့သည် ဆံတော်ရှင်စေတီတော်မြတ်ကို မွမ်းမံပြုပြင် ထိန်းသိမ်းကိုးကွယ်လာခဲ့ကြပါသည်။ ဆံတော်ရှင်ဘုရားသည် ရခိုင်ပြည်၊ ပေါက်တောမြို့နယ်၊ မြေငူကျွန်း၌ တည်ထားကိုးကွယ်လျက်ရှိသည်။
Photo -crd
+5
