ဟောင်ကောင်လေယာဉ်ဆီယိုစိမ့်၍ ထိုင်ဝမ်သို့ပြောင်း၍ ဆင်းသက်ရ
နိုဝင်ဘာ ၂၄ ရက်က ဂျပန်နိုင်ငံ ဖူကူအိုကာမြို့သို့ ပျံသန်းနေသော ဟောင်ကောင်လေကြောင်းလိုင်း၏ လေယာဉ်တစ်စင်းသည် ဆီယိုစိမ့်မှု သံသယကြောင့် တိုင်ပေမြို့ကို လမ်းကြောင်းပြောင်း ဆင်းသက်ခဲ့ရကြောင်း သိရသည်။
လေယာဉ်ခရီးစဉ်အမှတ် HX640 သည် ဒေသစံတော်ချိန် နံနက် ၉ နာရီခွဲဝန်းကျင်တွင် ဟောင်ကောင်အပြည်ပြည်ဆိုင်ရာ လေဆိပ်မှ ထွက်ခွာခဲ့ကာ ဖူကူအိုကာမြို့သို့ ညနေ ၁း၅၅ နာရီတွင် ဆိုက်ရောက်ရန် စီစဉ်ထားသည်ဟု လေယာဉ်လမ်းကြောင်းခြေရာခံဝက်ဘက်ဆိုက်ဖြစ်သည့် Flightradar24 အရ သိရသည်။
ဆောက်ချိုင်းနားမောနင်းပို့စ် သတင်းဌာန၏ မေးမြန်းမှုကို ဟောင်ကောင်လေကြောင်းလိုင်းက ပြန်လည်ဖြေကြားခဲ့ရာ၌ လေယာဉ်သည် နည်းပညာပိုင်း ပြဿနာကြောင့် လမ်းကြောင်းပြောင်းခဲ့ရခြင်းဖြစ်ကြောင်းနှင့် အဆင်မပြေရမှုများအတွက် တောင်းပန်ခဲ့သည်။
ကြိုတင်ကာကွယ်မှုအဖြစ် ရည်မှန်းရာသို့ ခရီးမဆက်မီ စေ့စေ့စပ်စပ် စစ်ဆေးရန် လေယာဉ်ကို ဆင်းသက်ခဲ့ရခြင်း ဖြစ်သည်ဟု လေကြောင်းလိုင်း၏ ပြောရေးဆိုခွင့်ရှိသူတစ်ဦးက ပြောဆိုခဲ့သည်။
ခရီးသည် ၂၈၃ ဦးနှင့် အမှုထမ်း ၁၃ ဦးပါဝင်သော လေယာဉ်သည် ညနေ ၁၂း၀၇ နာရီတွင် တိုင်ပေသို့ လုံခြုံဘေးကင်းစွာဆင်းသက်ခဲ့သည်ဟု သူက ပြောဆိုခဲ့ပြီး ခရီးသည်များကို ဒေသဆိုင်ရာ သယ်ယူပို့ဆောင်မှုနှင့် ဟိုတယ်အခန်းများ စီစဉ်ပေးခဲ့သည်လည်း ဆိုခဲ့သည်။
