🐟 #ငါးသလောက်ပေါင်း 🐟
***********************
ငါးသလောက် တစ်ကောင်ကို
အကြေးထိုး,အူဖောက် သန့်စင်ပီး
ဆား,သကြား,အရသာမှုန့်,နနွင်း,ရှောက်သီးတို့ဖြင့်နယ်၍
နာရီဝက်ခန့် နှပ်ထားပေးပါ။

ခရမ်းချဉ်သီး နှစ်ခြမ်းခြမ်းထားပါ။

ကြက်သွန်နီ နှစ်ခြမ်းခြမ်းထားပါ။

ကြက်သွန်ဖြူမွှာလေးများ မထူမပါး လှီးထားပါ။

_____________________________________________

🔺 ငါးသလောက် ပေါင်းပါတော့မယ်။ 🔺
***********************************
အိုးထဲဆီထည့်၍ ငရုတ်သီးအစိမ်းမှုန့် ထည့်မွှေပီးရင်
အပူပေးပီး မီးခဏပိတ်ပါ။

နှစ်ခြမ်းခြမ်းထားတဲ့
ကြက်သွန်နီ ,ခရမ်းချဉ်သီးကို
အောက်မှခံပြီး ခင်းပါမယ်။

ပီးရင် နှပ်ထားတဲ့ ငါးသလောက်များ တင်ပါမယ်။

ရေနွေးပူပူကို ငါးသလောက်မြုပ်အောင် ထည့်ပါမယ်။

မီးအားမပြင်းစေပဲ တည်ထားပါမယ်။
ရေခန်းရင် နောက်တစ်ရည် ထပ်ထည့်ရပါမယ်။
ပဲငံပြာရည် ထမင်းစားဇွန်း ၁ ဇွန်း ထည့်ပါမယ်။

ရေခန်းခါနီး, အိုးချခါနီး ၁၅ မိနစ် အလိုမှာ
ကြက်သွန်ဖြူခွဲခြမ်းလေးများ ထည့်ပေးပါ။

ဆီပျံလာရင် ငါးသလောက်ပေါင်းရပါပီ။

_____________________________________________

🔺 မှတ်ချက် 🔺
************
ကျမ ငါးသလောက်ပေါင်းရင်
ဂျင်း,စပါးလင် မထည့်ပါဘူး။

ရှောက်သီးက
အသားတင်းစေရန်နဲ့ အအီပြေစေရန် ထည့်ရပါတယ်။

ချိုမြမြ အရသာ ရရှိစေဖို့
ပဲငံပြာရည် ထမင်းစားဇွန်း ၁ ဇွန်း ထည့်ပေးရပါတယ်။

ကြက်သွန်ဖြူခွဲခြမ်းလေးတွေကတော့
ကြိုက်လို့ ထည့်တာပါ။
မထည့်ချင်ရင်လည်း ရပါတယ်။

ငါးသလောက် နူးချင်ဇောနဲ့ မီးပြင်း မတိုက်ရပါဘူး။
မီးအားအနေတော်နဲ့ ၆ နာရီခန့် ပေါင်းပေးရပါမယ်။
တနေကုန်ပေါင်းထားနိုင်ရင်တော့ အကောင်းဆုံးပါပဲ။

အိုးချခါနီးရင် ရေကျန်နေချိန်မှာ အရသာမြည်းကြည့်ပီး
အချို,အငံ အရသာ ချိန်ဆပါ။
အီနေရင်တော့ ရှောက်သီး ထပ်ညှစ်ထည့်ပေးပါ။

ဟင်းအနှစ် အနည်း အများအတွက်
ကြက်သွန်နီနဲ့ ခရမ်းချဉ်သီး ကို
မိမိ လိုသလောက် ချိန်ဆထည့်ပါ။

💖 အရသာတွေ စိမ့်ဝင်နေတဲ့
💖 ခရမ်းချဉ်သီးဖပ် အိအိကြီးထွေးထွေးကြီးတွေ
💖 ကြက်သွန်ဖပ် ချိုချိုကြီးတွေကို
💖 ငါးသလောက်အသားနဲ့အတူ တွဲဖက်ပြီး
💖 ဝါးစားရတာ အရမ်းကို အရသာရှိလှပါတယ်။

တစ်ကယ်လို့ အနှစ်နဲ့ ငါးသလောက်
တစ်သားတည်း ကျနေစေချင်ရင်တော့
ကြက်သွန်နီ ,ခရမ်းချဉ်သီးကို နှစ်ခြမ်းခြမ်းမထည့်ပဲ
အကွင်းလေးများ ကွင်းထည့်ပေးပါ။