Meta နှင့် Amazon တို့ (DEI) အစီအစဉ်များအား ရပ်ဆိုင်း

Meta နဲ့ Amazon နည်းပညာကုမ္ပဏီတို့ဟာ မတူကွဲပြားစုံလင်မှုနဲ့ သက်ဆိုင်တဲ့ DEI အစီအစဉ်တွေ လက်ခံ ကျင့်သုံးမှုကို ရပ်ဆိုင်းပြီး အဲဒီလို DEI အစီအစဉ်တွေကို ရပ်ဆိုင်းပစ်တဲ့ အမေရိကန်ကော်ပိုရိတ် လုပ်ငန်းစုတွေထဲမှာ ပါဝင်လာပါတယ်။
ကွန်ဆာဗေးတစ်ဝါဒီတွေက ဝေဖန်လေ့ရှိတဲ့ အဲဒီ DEI အစီအစဉ်အရ ဝန်ထမ်းငှားရမ်းမှု နဲ့ လေ့ကျင့်သင်တန်းပေးမှုအစီအစဉ်တွေဟာ တရားရေးနဲ့ နိုင်ငံရေးအရ အန္တရာယ်ရှိတယ် ဆိုပြီး အခုလို အစီအစဉ်တွေကို သောကြာနေ့မှာ ရပ်ဆိုင်းပစ်တာပါ။
Meta ၊ Istagram နဲ့ Whatsapp တို့က အမေရိကန် ရွေးကောက်ခံ သမ္မတ ထရမ့် နဲ့ ရီပတ်ဘလီကန်တွေက ဝေဖန်တဲ့ အချက်အလက်စိစစ်တဲ့ အစီအစဉ်တစ်ခုကို ရပ်ဆိုင်းမယ်လို့ ကြေညာပြီး ရက်ပိုင်းအကြာမှာ အခုလို DEI ရပ်ဆိုင်းမှု ပြုလုပ်လိုက်တာလည်းဖြစ်ပါတယ်။
အဲဒီလို DEI ကို ရပ်ဆိုင်းတဲ့အထဲမှာ Walmart နဲ့ မက်ဒေါ်နယ်လ် (McDonalds) တို့လည်း ပါဝင်ပါတယ်။
Metaကတော့ လုပ်ငန်းအနေနဲ့ မတူကွဲပြားတဲ့ လူမျိုးစုံ ဝန်ထမ်းတွေကို ဆက်လက် ရှာဖွေခန့်အပ်မှုတွေ လုပ်မှာဖြစ်ပေမဲ့ အခု လက်ရှိ ချဉ်းကပ်မှုပုံစံနဲ့ ခန့်အပ်မှုမျိုးကို ရပ်ဆိုင်းထားမယ်လို့ ပြောပါတယ်။
ပြီးခဲ့တဲ့ ဒီဇင်ဘာလတုန်းက ဝန်ထမ်းတွေကို ပေးပို့ခဲ့တဲ့ Amazonရဲ့ အသိပေးစာမှာလည်း ကုမ္ပဏီအနေနဲ့ အများပါဝင် ကိုယ်စားပြုမှုနဲ့ဆက်စပ်တဲ့ ခေတ်မမီတော့တဲ့ အစီအစဉ်တွေကို (၂၀၂၄) နှစ်ကုန်မှာ အပြီးသတ်ရပ်နားဖို့ ရည်ရွယ်ကြောင်း ဖော်ပြပါရှိခဲ့ပါတယ်။
လွန်ခဲ့တဲ့ (၂)နှစ်ကလောက်ကစပြီး ရီပတ်ဘလီကန်တွေဟာ BlackRock နဲ့ Disneyတို့လို လုပ်ငန်းတွေကို Woke progressive activism လို့ ပြောင်းလဲသုံးနှုန်းထားတဲ့ ကွန်မြူနစ်စနစ် ကျင့်သုံးသူတွေအဖြစ် စွပ်စွဲခဲ့ကာ နိုင်ငံရေးအရ အပြစ်ပေးမယ်လို့လည်း ခြိမ်းခြောက်တိုက်ခိုက်မှုတွေ လုပ်လာခဲ့ပါတယ်။
အဲဒီနောက်ပိုင်း အထူးသဖြင့် ဒေါ်နယ်ထရမ့် မဲနိုင်ပြီးနောက်မှာ အခုလို DEI အစီအစဉ်ကို ရပ်ဆိုင်းတဲ့ လုပ်ငန်းတွေ ပိုများလာတာဖြစ်ပါတယ်။