ပင်စင်လစာများကို မြန်မာနိုင်ငံတစ်ဝန်းရှိ မြန်မာ့စီးပွားရေး ဘဏ်ခွဲများတွင် ဝန်ဆောင်ခ အခမဲ့ဖြင့် ထုတ်ယူနိုင်

နိုင်ငံ့ဝန်ထမ်း အငြိမ်းစားများအနေဖြင့် ပင်စင်လစာများကို မြန်မာနိုင်ငံတစ်ဝန်းရှိ မြန်မာ့စီးပွားရေး ဘဏ်ခွဲ (၁၆၅) ဘဏ်အနက် မည်သည့် ဘဏ်ခွဲတွင်မဆို ဝန်ဆောင်ခ အခမဲ့ဖြင့် ထုတ်ယူနိုင်မည်ဖြစ်ကြောင်း သိရသည်။

မြန်မာ့စီးပွါးရေးဘဏ်သည် ပင်စင်လစာထုတ်ပေးခြင်းလုပ်ငန်းကို e-Pension စနစ်မှ Centralized e-Pension စနစ်သို့ ၂၀၂၃ ခုနှစ်၊ စက်တင်ဘာလမှစ၍ အဆင့်မြှင့်တင်ဆောင်ရွက်ခဲ့ပြီး ၂၀၂၅ ခုနှစ်၊ ဇန်နဝါရီလအထိ Centralized e-Pension စနစ် ဆောင်ရွက်နေခြင်း ဖြစ်သည်။

ထိုသို့ဆောင်ရွက်နေခြင်းသည် မြန်မာနိုင်ငံတစ်ဝန်းရှိ မြန်မာ့စီးပွားရေး ဘဏ်ခွဲ (၁၆၅) ဘဏ်ရှိပြီဖြစ်၍ ယင်း ဘဏ်ခွဲများတွင် အငြိမ်းစားများအနေဖြင့် ပင်စင်လစာများကို ဝန်ဆောင်ခ အခမဲ့ဖြင့် ထုတ်ယူနိုင်မည်ဖြစ်သည်ဟု ဆိုသည်။

ထို့ပြင် လက်ရှိတွင် ရန်ကုန်မြို့ရှိ မြန်မာ့စီးပွါးရေးဘဏ်ခွဲ ကိုးခု၌လည်း ပင်စင်လာရောက် ထုတ်ယူသည့် ပင်စင်စားဝန်ထမ်းများကို လစဉ် (၂၁) ရက်မှ (၂၄) ရက်အထိ သက်သာသော စျေးနှုန်းဖြင့် စားအုန်းဆီများကိုလည်း ရောင်းချပေးလျက်ရှိကြောင်း သိရသည်။