New Orleans မှာတိုက်ခိုက်သူ IS စစ်သွေးကြွအဖွဲ့ကိုအားကျ
အမေရိကန်ပြည်ထောင်စု New Orleans မြို့မှာ နှစ်သစ်ကူးနေ့က လူစည်ကားတဲ့ Bourbon လမ်းမပေါ် ကားနဲ့ အတင်းဝင်တိုက်မှုမှာ သေဆုံးသူ ၁၅ ယောက် ရှိသွားပါပြီ။ ယာဉ်မောင်းဟာ အမေရိကန်ဖွား အမေရိကန်နိုင်ငံသား စစ်ပြန်တယောက်ဖြစ်ပြီး IS စစ်သွေးကြွအဖွဲ့ကို အားကျသူ ဖြစ်တယ်လို့ သမ္မတ Joe Biden က ဗုဒ္ဓဟူးနေ့ညက ပြောကြားခဲ့ပါတယ်။
“ဘာဖြစ်ခဲ့သလဲ၊ ဘာကြောင့်ဖြစ်ခဲ့သလဲ၊ အများပြည်သူလုံခြုံရေးအပေါ် ဆက်ပြီး စိုးရိမ်ရသလား ဆိုတာ FBI ကဆက်လက် စုံစမ်းနေတယ်” လို့ သမ္မတ Biden ပြောကြားခဲ့တာပါ။
ကားနဲ့တိုက်သတ်သူဟာ Texas ပြည်နယ်မှာမွေးဖွားတဲ့ အမေရိကန်နိုင်ငံသားဖြစ်ပြီး အမေရိကန် စစ်တပ်မှာ နှစ်နဲ့ချီ စစ်မှုထမ်းခဲ့သူဖြစ်တဲ့အပြင် မကြာခင်နှစ်ပိုင်းတွေအထိ အရန်တပ်ဖွဲ့ထဲမှာ စစ်မှုထမ်းခဲ့တယ်လို့ သမ္မတကပြောပါတယ်။ ကမ္ဘာလှည့်ဧည့်သည်တွေနဲ့ အမြဲစည်ကားနေလေ့ရှိတဲ့ French Quarter အရပ်က Bourbon လမ်းမပေါ်မှာ နှစ်ဆန်း ၁ ရက်နေ့က ကားနဲ့ အတင်းဝင် မတိုက်ခင် နာရီပိုင်းအလိုက လူသတ်သမားဟာ IS စစ်သွေးကြွအဖွဲ့ကို အားကျကြောင်းနဲ့ လူတွေကို သတ်ချင်ကြောင်း လူမှုကွန်ရက်ပေါ်မှာ ဗီဒီယိုတင်ခဲ့တယ်လို့လည်း သမ္မတ Biden ကပြောပါတယ်။
လူတွေကိုအတင်းဝင်တိုက်တဲ့ အငှားကားထဲမှာ IS စစ်သွေးကြွအလံကိုလည်း FBI က ရှာဖွေတွေ့ခဲ့ပါတယ်။ ပေါက်ကွဲနိုင်စေနိုင်တဲ့ပစ္စည်းတွေကို ကားထဲမှာသာမက အနားတဝိုက်မှာလည်း တွေ့ခဲ့တယ်လို့ ကားနဲ့ဝင်တိုက်မှုနဲ့ပတ်သက်လို့ သမ္မတ Biden ကဗုဒ္ဓဟူးနေ့က ပြောကြားခဲ့ပါတယ်။
ယာဉ်မောင်းသူဟာ အသက် ၄၂ နှစ်အရွယ် Shamsud-Din Jabbar ဖြစ်ပြီး အခင်းဖြစ်တဲ့နေရာမှာ ရဲနဲ့အပြန်အလှန် ပစ်ခတ်မှုအတွင်း သေဆုံးခဲ့ပါတယ်။ ဒီတိုက်ခိုက်မှုကို အကြမ်းဖက်လုပ်ရပ်အဖြစ် တာဝန်ရှိသူတွေ သတ်မှတ်စုံစမ်းနေပြီး သူတယောက်တည် လုပ်တဲ့ တိုက်ခိုက်မှု မဟုတ်ဘူးလို့ အာဏာပိုင်တွေက ပြောပါတယ်။ နှစ်သစ်ကူးပွဲဆင်နွဲသူတွေနဲ့ စည်ကားနေတဲ့ လမ်းပေါ် ကားနဲ့အတင်းဝင်တိုက်မှုကြောင့် သေဆုံးသူ ၁၅ ယောက်နဲ့ ထိခိုက်ဒဏ်ရာရသူ ၃၀ နီးပါးရှိပါတယ်။
Crd